Иван Ярыгин түһүлгэтиттэн санаалар

Дьэ, бу ааспыт өрөбүллэргэ, сылын ахсын тохсунньуга буолан ааһар, аан дойду таһымнаах, Иван Ярыгин Кубога, успуорт бырааһынньыга этэҥҥэ ситиһиилээхтик түмүктэннэ. 400-тэн тахса бөҕөс 23 дойдуттан кэлэн күөн көрүстүлэр.

Ол иһигэр, 22 сахабыт уолаттара уонна 5 кыыспыт туһуннулар. Сахабыт сиригэр мэтээли аҕаллылар – Константин Капрынов (70 кг) 2-с миэстэ, Лев Павлов (57 кг) 2-с миэстэ, Александр Авелов (61 кг) 3-с миэстэ уонна Севиль Назарова (55 кг) 3-с бочуоттаах миэстэни ылары ситистилэр.

Буоларын курдук, Иван Ярыгин турнира көҥүл тустууга, Арассыыйа үрдүнэн биир саамай үрдүкү таһымнаах күрэхтэһиинэн биллэр. Манна бастаабыттар салгыы Европа чөмпүйэнээтигэр кыттар быраабы ылаллар. Онон хас биирдии тустуукка олус эппиэтинэстээх суол. Ону тэҥэ, Арассыыйа бастакы нүөмэрдэрэ, Олимпиада кыайыылаахтара, призёрдара, улахан кылаастаах спортсменнар кыттыыны ылаллара, күрэхтэһии таһымын, суолтатын үрдэтэллэрэ, эдэрдэргэ сытыы утарсыылары оҥороллоро, көрдөрөллөрө сүрдээх бэрт, көрөргө да астык.

Константин Капрынов туһунан

Онтон сиэттэрэн, тус бэйэм, Константин Капрынов тустуутун сэргээн, бэлиэтээн этиэхпин баҕарабын. Бу быйылгы Ярыгиҥҥа, Константин бэйэтин үчүгэйдик көрдөрдө, таах туран хаалбакка, бэйэтин тустуутун көрдөөн, бырахсары кытта бырахсан, олус сымсатык, түргэнник-тарҕаннык атахтаталаан, албас оҥортолоон очко, балл ылан, пъедестал иккис үктэлигэр таҕыстаҕа.

70 кг ыйааһыҥҥа ааттаах-суоллаах, оттон-мастан оҥоһуллубатах бөҕөстөр бары кэриэтэ бааллара. Ол курдук: Евгений Жербаев, Курбан Шираев, Загир Шахиев уо.д.а. Күүстээх сетканы ааһан, утарсааччыларын туоратан, кырдьык сэргэх хамсаныылаах тустууну көрдүбүт. Ити барыта сыралаах, күүстээх, дьаныардаах үлэттэн кэлэрэ чахчы. Өй, төбө, психология үлэтэ эмиэ улахан оруолу оонньуура саарбаҕа суох.

Лев Павлов туһунан

Лев Павловы этэр эбит буоллаххына, олоҕор иккис төгүлүн Ярыгин турнирыгар кыттан, былырыын иккис эргииринэн туораабыт эбит буоллаҕына, быйыл 2-с миэстэҕэ таҕыста. Бу куһаҕана суох көрдөрүү, эбиллии баара көстөр.

Ол эрэн, аҕыйах сылынан Америкаҕа, Лос-Анджелес куоракка ыытыллыахтаах Олимпиадаҕа, бэйэтэ эппитин курдук сыалланар буоллаҕына, Лев Арассыыйаҕа утарсааччыларын барыларын туох да мөккүөрэ суох, биллэ, ыраастык баһыйардык кыайа тутар буолуохтаах. Аны омук, тас дойдуларыгар үчүгэй, кыахтаах, кэскиллээх, өссө эдэртэн-эдэр тахсан иһэр уолаттарын эмиэ биллэ элбэхтэр. Онон бу финалга хотторуута, кинини инники ситиһиилэригэр, нууччалыы эттэххэ, эбии мотивация, стимул буолан, кыайыыларга-хотууларга кынаттыа диэн бука бары эрэнэбит, кэтэһэбит уонна ыалдьабыт.

Александр Авелов туһунан

Салгыы Александр Авеловы этэр эбит буоллаххына, арыллан, кииртэлээн, тыҥааһыннаах киирсиилэри көрдөрөн, дьонун-сэргэтин үөртэ диэтэхпинэ, сыыспаппын. Кыайыыга дьулуурдааҕын, бэйэтигэр эрэллээҕин көрдөрөн, дьаныһан туран ылыахтааҕын ылла дии саныыбын. Үһүс иһин киирсиитигэр, Дагестан бөҕөһүн баһыйа-көһүйэ туппутуттан, сахалар бары биир сомоҕолуу үөрбүппүт, киэн тутта көрбүппүт.

Кыргыттарбыт тустарынан

Кыргыттарбытыттан Севиль Назарова Ярыгин түһүлгэтигэр олоҕор үсүһүн миэстэлэстэ, стабильно үс иһигэр олорор кыахтааҕын көрдөрдө диэн этиэххэ наада. Оттон Александра Копылова спортивнай олоҕор иккиһин 5-с миэстэҕэ тигистэ. Эдэр киһи бэйэтин көрдөрүөҕэ, ситиһиилэрэ өссө да иннигэр турдаҕа.

Түмүктээн эттэхпинэ…

Быйылгы Ярыгин турнирыттан түөрт мэтээл кэлбитэ уопсай хартыынаҕа эбиллии, хамсааһын барбытын туоһулуур уонна көрдөрөр. Биллэн турар, мэтээл кэннигэр, спортсмен киһи төһөлөөх элбэх көлөһүнү тоҕорун этэ да барыллыбат, туох барыта сыралаах үлэттэн, тулууртан, дьаныартан кэлэрин билэбит. Күн аайы күүстээх дьарык, дисциплиналаах буолуу, күннээҕи аһыыр, утуйар режимы сөпкө тутуһуу, бэрээдэк – бу ситиһии биир тутаах, сүрүн төрдө.

Онон уолаттарбытыгар эрэх-турах санаа баһаам, салгыытын бу хотторуу хомолтото, кыһыы кинилэри инники сыалларын ситиһэллэригэр үтүө сирдьит сулус буолан үрдүккэ, сырдыкка кынаттыа диэн бигэ эрэллээхпин.

Милена АНДРЕЕВА, М.К. Аммосов аатынан Хотугулуу Илиҥҥи федеральнай университет студентката.