Эрилик кубогар…

Тохсунньу 11-12 күннэригэр Чурапчы сэлиэнньэтигэр А.И. Федотов аатынан Спорт киинигэр волейболга сыллата ыытыллар Эрилик кубогын ылан иһин күрэхтэһии буолла. Барыта оскуола оҕолорунуун 14 хамаанда кыттыыны ылла. Ол иһигэр киргизтэр “Манас” волейбольнай кулууптара киирсэн, күрэхтэһиини сытыырхатта.

Икки күн устата барбыт сытыы, илин-кэлин түсүһүүлээх тирии мээчик күрэҕэр финалга Таатта, Чурапчы, Мэҥэ Хаҥалас хамаандалара уонна ”Манас” волейбольнай кулууп таҕыстылар.

Үһүс миэстэ иһин киирсиигэ бастакы оонньууга “Манас” волейболистара 25:16 хоттулар. Иккис партияҕа таатталар кыранан чорбойон кыайыылаах буоллулар. Үһүс, кыайыылааҕы быһаарар оонньуу 15 очукуоҕа диэри буолуохтааҕа. Хамаандалар тэбис тэҥҥэ испиттэрэ – 6:6, 9:9, 14:14. Таатта хамаандата хомуллан, икки очукуону субуруччу ылан кыайыылаах таҕыста.

Бастакы миэстэ иһин бу иннинэ ,,Манас” кулуубу кыайбыт Мэҥэ Хаҥалас уонна таатталары кыайбыт Чурапчы хамаандалара күөн көрстүлэр. Олохтоохтор бэйэлэрин дьонноро кыайалларыгар бүк эрэллээх этилэр. “Ыалдьааччылар” хаһыыларыттан саала өрө оргуйа олордо. Эрбии биитин курдук тэҥ ахсаанынан баран испит бастакы оонньуу түмүгүн баһыйа тутан, Чурапчы 25:21 кыайан таҕыста.

Иккис партияҕа ахсаан эмиэ тэҥҥэ испитэ – 4:4, 9:9, 18:18, 21:21. Чурапчы кыайара 1 очукуо хаалбытын кэннэ, подача сеткаҕа иҥнэр. Очукуо 25:25 буолбутун кэннэ, мэҥэлэр олус наадалаах 2 очукуону мүччү туттараннар хотоллор. Үһүс быһаарыылаах оонньуу эмиэ итинник барар. Ахсаан  5:5, 10:10, 14:14. Олохтоохтор өй мэйдээх тулуйбат хаһыытын түһэрэллэр. Ол эрээри, быһаарыылаах очукуолары Мэҥэ волейболистара ыланнар, кыайыылаах тахсаллар, Эрилик кубогын хаһаайыннарынан буолаллар.

Наҕараадалааһыҥҥа бастаабыт Мэҥэ Хаҥалас хамаандатыгар 100 тыһ. солк., иккис буолбут Чурапчыга 70, үсүһү ылбыт Таатта волейболистарыгар 50 тыһ. солк. Чурапчы улууһун баһылыга С.А. Саргыдаев туттарда.

Бастыҥнарга – турнир бастыҥ оонньооччута, бастыҥ кимээччи, бастыҥ көмүскээччи, көрөөччүлэр биһирэбиллэрэ, о.д.а. анал номинациялар тутарылыннылар.

Алексей Слепцов.

Чурапчы.