«Дьулурҕан» хаһыат тэриллибитэ 25 сылынан!

Биир дойдулаахпытын, Россия суруналыыстарын Сойууһун чилиэнин, Саха Республикатын Бэчээтин туйгунун, Мүрү нэһилиэгин, Уус Алдан улууһун бочуоттаах олохтооҕун, библиотека истиҥ доҕорун Петр Семенович Павловы спорка аналлаах «Дьулурҕан» хаһыат тэриллибитэ 25 сылынан итиитик-истиҥник эҕэрдэлиибит!

Биһиги, улуус библиотекардара, биһиккин ыйаабыт тапталлаах Мүрү киэҥ туонатыттан, «Ленинскэй тэрийээччи», «Мүрү саһарҕата» хаһыаттарыттан куорсун анньынан республика спорду сэҥээрээччилэрин куттарын туппут «Дьулурҕаны» иилээн-саҕалаан үлэлии-хамсыы сылдьаргыттан үөрэбит.

«Дьулурҕан» хаһыат күн бүгүн тиһигин быспакка спорт араас тематыгар ырытыылары оҥорорун, биллиилээх спортсменнар, интэриэһинэй дьылҕалаах дьон туһунан ыстатыйалара дьон сэҥээриитин ыларын, Саха сирин олохтоохторугар спорду сырдата турарын, үгүс ааҕааччы болҕомтотун тардарын бэлиэтиибит.

Өрүү маннык эрчимнээх, элбэх доҕоттордоох-атастардаах, инникигэ эрэллээх сүүрэ-көтө, үлэлии-хамсыы сырыт диэн баҕа санаабытын тиэрдэбит. Инникитин өссө даҕаны элбэх сонуну, үйэлээҕи, кэскиллээҕи айа-тута сылдьаргар баҕарабыт!

Уус Алданнааҕы кииннэммит библиотека тиһигин коллектива.