Биллэр хапсаҕайдьыты кытта көрүстүбүт

М.К. Аммосов аатынан ХИФУ илиҥҥи норуоттар тылларын уонна култуураларын үөрэтэр үнүстүүт саха литературатын кафедратын устудьуоннарыгар Владислав Левчиков ыалдьыттаата.

Владислав Кэбээйи улууһун Мукучу нэһилиэгиттэн силис-мутук тардыылаах саха чаҕылхай ыччата. Кини аатырбыт Мукучу хапсаҕайын оскуолатын иитиллээччитэ, хапсаҕайга спорт маастара, Хорватияҕа ыытыллыбыт кумахха тустууга Аан дойду чөмпүйүөнэ, “Саха-Арена” маҥнайгы кыайыылааҕа, өрөспүүбүлүкэ элбэх төгүллээх чөмпүйүөнэ уонна призера.

Спортсмен киһи атын эйгэҕэ эмиэ уһулуччу буолара биллэр. Владислав дьон-сэргэ кинини спортсмен эрэ быһыытынан билэрин баҕарбат. Олох сайдарын кытта тэҥҥэ барсан иһэр, элбэҕи сатыыр, билэр-көрөр киһи буоларын быһыытынан, билигин урбаан эйгэтигэр киирэн 4 бизнестаах. Ону тэҥэ кини тахсан иһэр блогер уонна ырыаны айааччы, толорооччу. Устудьуоннуур сылларыгар гитаранан доҕуһуоллаан суруйбут “Эйиэхэ ыччакка” ырыата Саха сирин эдэр ыччатын сырдык олоххо, күүстээх санаалаах буоларга угуйар.

Владислав сүрдээх боростуой, үөрэ-көтө сылдьар, саха киһитин сиэринэн сэмэй, холку. Кини олоҕу көрүүтэ хас биирдии түгэни сыаналыырга үөрэтэр. Бэйэтэ сылдьарын тухары тулалыыр дьонун саҥаҕа, сырдыкка, үчүгэйгэ эрэ тардар, нууччалыы эттэххэ мотивациялыыр.

Ыалдьыт көрсүһүү устата спортивнай карьератын, үлэтин, дьиэ кэргэнин, урбаан уонна блогерство эйгэтин туһунан кэпсээтэ. Устудьуоннар бириэмэни сөптөөхтүк аттарыы, бэйэ блогун хайдах сайыннарыахха сөбүн туһунан ыйытыыларыгар бэйэтин көрүүтүн, туһалаах сүбэлэрин биэрдэ.

Буолаары турар “Хаҥалас Хапсаҕайа” маҥнайгы норуоттар икки ардыларынааҕы турнирга кыттыыны ылаары сылдьар. Онон Владиславка ситиһиилэри баҕарыаҕыҥ!

Анжелина ЖДАНОВА, ХИФУ, ХИНТуоКИ 1-кы куурсун устудьуонката.