Бастакы финаллар түмүктэринэн 4 мэтээллэннибит

Иван Ярыгин кубогар спортивнай тустууга норуоттар икки ардыларынааҕы XXXVI турнир бастакы кыайыылаахтара быһаарылыннылар. Күрэхтэһии иккис күнүн киэһэтигэр көҥүл тустууга дьахталларга уонна эр дьоҥҥо маҥнайгы мэтээллэр иһин хапсыһыылар буоллулар.

Саха сиригэр бастакы мэтээли Севиль Назарова (55 кг) аҕалла. Кини сүрдээх сытыытык, хардары-таары бырахсыылаахтык барбыт киирсиигэ олохтоохтор эрэллэрэ Т.Новигы 8:7 ахсаанынан кыайан, боруонса мэтээли ылла. Санатан эттэххэ, Севиль – тренер Ким Колодезников салалтатынан дьарыктанар. Оттон, эмиэ үһүс бириистээх миэстэ иһин тустубут Александра Копылова (50 кг) – Беларусь кыыһыгар хотторон кэбистэ.

57 киилэҕэ финалга биһиги Лев Павловпыт (тренерэ Николай Данилов) уонна Россия, Европа чемпионаттарын призера тувин Начын Монгуш көрүстүлэр. Бу кинилэр көбүөргэ үһүс сирэй көрсүүлэрэ. Аан бастакылара иллэрээ сыл (2023) 23-гэр диэри саастаахтарга Россия күрэхтэһиитин финалыгар буолбута. Онно кыайыыны 7:5 ахсаанынан Монгуш ситиспитэ. Оттон иккис көрсүһүүлэрэ былырыын Россия чемпионатыгар буолбута. Онно сүрдээх хатыһыылаах киирсиигэ Лев 0:2 хотторон иһэн, бүтэһик сөкүүндэлэргэ утарсааччытын атаҕынан олуйан түһэрэн ахсааны тэҥнээбитэ уонна кыайыылааҕынан ааттаммыта.

Бу да сырыыга иккис түһүмэх ортотугар диэри очконан хотон иһэн, албаска киирэн биэрэн, 5:7 ахсаанынан хотторон кэбистэ. Хапсыһыы хайдах барбытын, видеоҕа уһулууну «Дьулурҕан» ютуб каналыгар көрүөххүтүн сөп.

61 киилэҕэ боруонса мэтээл иһин киирсиигэ Александр Авелов (тренерэ Будимир Яковлев) дагестанец Имам Умаровы кытта туһунна. Бу да киирсиигэ Авелов бэйэтин байыастыы характерын көрдөрдө. Уонна этэргэ дылы, ыалдьааччылары бүргэс үрдүгэр олордубут хапсыһыыга, олох бүтэһик сөкүүндэлэргэ очко ылан, утарсааччытын 9:7 ахсаанынан кыайда. Итиэннэ көрөөччүлэр биһирэбиллэрин, үтүө сыанабылларын ылла.

70 киилэҕэ бастакы миэстэни ким ыларын быһаарсыыга Саха сирин көҥүл тустууга сүүмэрдэммит хамаандатын хапытаана Константин Капрынов (тренерэ Егор Пономарев) – Россия уонна аан дойду чемпиона Давид Баевы (Хотугу Осетия-Алания) утары таҕыста. Бу тустуу 3:3 ахсаанынан, Баев туһатыгар түмүктэннэ. Ханныгын да иһин, Капрынов бэркэ туһунна. Кини кимтэн да толлубат, кимээһиннээх тустуута атыттарга холобур эрэ буолуон баҕарабын. Ярыгин турнирын икки төгүллээх призерунан буолла. Иллэрээ сыл боруонса мэтээллээх буоллаҕына, бу сырыыга онтукатын үрүҥ көмүскэ кубулутта. Аныгыскыга кыһыл көмүһү ылар гына үлэлииргэ!

Оттон бу ыйааһыҥҥа мэтээл иһин тустууга иккис киһибит – Ярыгин турнирын былырыыҥҥы боруонса призера Айсен Потапов (тренерэ Артур Константинов) Европа чемпиона буола сылдьыбыт дагестанец Курбан Шираевы кытта кииристэ. Манна кини тоҕо эрэ иннинээҕи тустууларын курдук кимээһиннээхтик тустубата, 0:5 ахсаанынан сабырыйтарда. Ол да буоллар, биэс күүстээхтэр ахсааннарыгар киирэн, Россия тренердэрин болҕомторугар ылылынна диэххэ сөп.

Онон бу күн түмүгүнэн Вадим Семенов сүрүн тренердээх Саха сирин хамаанда икки үрүҥ көмүс (Лев Павлов, Константин Капрынов), икки боруонса (Александр Авелов, Севиль Назарова) мэтээллэннэ.

Күрэхтэһии салҕанар. Биһиги сайтпытын уонна «Дьулурҕан» телеграмҥа, ютуб каналга таһаарыыларын кэтээн көрө сылдьаргытыгар сүбэлиибин.

Петр ПАВЛОВ.