Сонуннар

Арыйаан Тютрин – Беларусь үс төгүллээх чемпиона

Минскэйгэ, Беларусь Республикатын көҥүл тустууга чемпионата ыытыллан түмүктэннэ. Манна биһиги биир дойдулаахпыт, Россия уонна аан дойду чемпионаттарын призера, Аан дойду кубогын кыайыылааҕа Арыйаан Тютрин ситиһиилээхтик кытынна.

Кини бу сырыыга, син эмиэ былырыын күһүн А.Медведь кэриэһигэр норуоттар икки ардыларынааҕы турнирга курдук, 61 киилэҕэ туһунна.

Күрэхтэһии биир күнүнэн ыытыллан түмүктэннэ. Арыйаан ыйааһыныгар барыта 15 бөҕөс баара. Кини утуу-субуу Никита Денишины, Никита Березуны ыраастык уонна Роман Зенькону очукуонан ыраастык (12:0) кыайталаан баран, киэһэ быһаарыылаах хапсыһыыга Иван Громыконы 6:5 ахсаанынан хотто. Итинэн Арыйаан Тютрин – Беларусь Республикатын үс төгүллээх чемпионунан буолла. Ол курдук, 2021, 2023 сылларга 57 киилэҕэ бастаабыт эбит буоллаҕына, быйыл 61 кг кыайда. Онон хамаанда сүрүн састаабыгар киирэн, салгыы улахан таһымнаах күрэхтэһиилэргэ кыттарга бэлэмнэнэр.

Арыйаан бу кыайыытын кини тус тренерэ, Саха Республикатын үтүөлээх тренерэ Иван Иванович Дмитриев тэҥҥэ үллэстэр. Киниттэн кылгастык санаатын үллэстэригэр көрдөстүбүт:

Арыйаан, сэтинньи ыйтан манна кэлэн эрчиллиини барбыта. Кини бастыырыгар эрэнэр этим. Үс бастакы эргииргэ эдэр уолаттары кыайталаата. Оттон ити финалга тустубут Громыко диэн уола – Беларусь чемпиона, призера, эдэрдэргэ Европа түһүлгэтигэр эҥин кытта сылдьыбыт бөҕөс. Былырыын 65 киилэҕэ көһөн туста сылдьыбыта, быйыл 61 кг түһэрэн кытынна. Онон опыттаах тустуук диэхпин баҕарабын.

Ити ыйааһыҥҥа биир сүрүн утарсааччыбыт Шамело тоҕо эрэ тустубата. Арыйаан бойобуой ыйааһына – 57 кг. Бу олунньу ыйга Александр Медведь турнирыгар 57-ҕэ тустуоҕа. Салгыы, барыта этэҥҥэ буоллаҕына, муус устарга Европа чемпионатыгар кыттарга суоттанабыт. Ол инниттэн «Стайкига» буолар анал үөрэтэр-эрчиллиилэргэ бэлэмнэниини барыаҕа.

Түгэнинэн туһанан, Арыйаан Тютрины уонна кини тренерэ И.И. Дмитриеви эҕэрдэлиэҕиҥ! Итиэннэ салгыы ситиһиилэри баҕарыаҕыҥ.

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *

289252
Бүгүн : 208