“Тустуу аргыстаах оҕо сааһым”

// Хатаска оскуола оҕолоругар тустууга күрэхтэһии буолан ааста

Ааһан эрэр 2024 сыл Хатаспытыгар үөрүүлээх-көтүүлээх түгэннэриттэн биирдэстэрэ 7 нүөмэрдээх спортивнай оскуола киэҥ уораҕайын аһыллыыта буолбута. Ол күнтэн ыла саала аана сабыллыбаттыы, күнүн аайы араас хайысхаҕа эҥин эгэлгэ күрэхтэһиилэр, табаарыстыы көрсүһүүлэр, турнирдар о.д.а. буолуталаатылар.

Оскуола икки сүүсчэкэ үөрэнээччилээх эбит буоллаҕына, күн бүгүн хас эмит төгүл элбэх оҕо сылдьар. Хас биирдии көрүҥҥэ дьарыктанааччы ахсаана лаппа биллэрдии эбилиннэ, сыыйа-баайа үтүө түмүктэр көстүтэлээн эрэллэр.

Бүгүн кэпсиир-сэһэргиир көрүҥмүт – көҥүл тустуу. Бу көрүҥ спортивнай оскуолабыт аһыллыаҕыттан баар. Кэлиҥҥи сылларга сыыйа-баайа Арассыыйа таһымыгар буолар күрэхтэһиилэргэ сүүмэрдэммит хамаандаҕа кииртэлээн, сбордарга ыҥырыллан сылдьыталаан эрэллэр. Ити талааннаах-дьоҕурдаах оҕолору таба тутан дьарыктааһынтан, эрчийииттэн, сыаллаах-соруктаах үлэттэн тахсара чуолкай. Ону таһынан тустууга тренер Александр Павлович Осипов өр сыллаах былааны туруорунан, ол былаан быһыытынан арахсыбакка, дьаныһан үлэлээн бу көрүҥү киэҥ араҥаҕа таһаарыы хамсааһына күүстээх диэн билиниэххэ наада.

Ол чаҕылхай дакаастабыла буолбут, бу дьыл ахсынньы 21 күнүгэр Хатастааҕы спорт комплекс тустуу саалатыгар кыра саастаах оҕолорго – алын сүһүөх кылаас үөрэнээччилэригэр көҥүл тустууга күрэхтэһии буолан ааста. Манна киһи тоһоҕолоон бэлиэтиирэ, 7 нүөмэрдээх оҕо спортивнай оскуолатын устуоруйатыгар аан маҥнайгынан бу күрэхтэһиигэ сэттэ уонча, барыта Хатас оҕото кытынна! Бу туһугар ситиһии, үлэ үтүө түмүктээх буолуута.

Күрэхтэһии бэйэтэ туспа бырайыак буолан “Тустуу аргыстаах оҕо сааһым” диэн анал ааттанна. Бырайыак ааптара, оскуола тустууга салаатын тренерэ Осипов Александр Павлович. Бырайыак олоххо киириитигэр тэрээһин өттүгэр оскуола кэлэктиибэ бары үлэлэстилэр, тренердэр дьарыктаатылар, төрөппүттэр оҕолорун таҥастарын-саптарын, астарын-үөллэрин бэлэмнээтилэр, тренердэр ирдэбиллэрин толорон күннээҕи режимҥэ үлэлэстилэр о.д.а.  Александр Павловичтыын кэпсэтии маннык буолла:

–Дьэ, сыыйа-баайа сыҕарыйан, эбиллэн, уопутуран уонна саалабыт кэҥээн, тренердэр элбээммит хас эмит сылы быһа ыра санаа оҥосто сылдьыбыт күрэхтэһиибит кэҥээн-тэнийэн таҕыста. Күрэхтэһии кыттааччыта элбэҕинэн, өйөөччүтэ үгүһүнэн үөртэ. Күрэхтэһиибитин “Тустуу аргыстаах оҕо сааһым” диэн анал ааттаатыбыт кэлин кэлин оскуолабыт аатын ааттатар күрэхтэһии буолуо диэн испэр сэмэйдик эрэнэбин. Күрэхтэһиигэ кыттыыны ылбыт бастакы, иккис, үһүс, төрдүс, бэһис кылаас үөрэнээччилэрэ олус көхтөөхтүк, дьиҥнээхтии ис сүрэхтэриттэн баҕаран оҕолуу олус ыраастык, кимиилээхтик, сытыытык кииристилэр. Быйыл Табаҕаҕа Хатастааҕы оҕо спортивнай оскуолатын филиала аһыллан ыаллыы нэһилиэкпититтэн 3 оҕо кытынна. Уопсайа 13 ыйааһынынан 70 оҕо кыттыыны ылла, ыаллаһа турар Табаҕа нэһилиэгиттэн үс оҕо кэлэн кыттыыны ылбыта. Хатастааҕы ДЮСШ тустууга филиала үлэтин саҕалаабыта.

Күрэхтэһии сүрүн сыала бастакы, иккис, үһүс, кылааска үөрэнэр оҕолору тустуу күрэхтэһиитэ диэн хайдаҕын, хайдах ааһарын билиһиннэрии курдук ааста. Оҕолор көхтөөхтүк кытыннылар ону кытары төрөппүттэрэ да хаалсыбатылар. Төрөппүттэр бэйэлэрин эрэ оҕолоругар ыалдьыбакка тыҥааһыннаах, элбэх бырахсыылаах киирсиилэри сэҥээрэ көрдүлэр. Ытыс тыаһа, көҕүлүүр, хайгыыр хаһыылар утуу-субуу иһиллэллэрэ күрэхтээһиччини санаатын көтөҕөр, күүс-кыах биэрэр буоллаҕа.

Күрэхтэһии бастыҥ тустууктара: Петров Борис 1 кл, Гуляев Ариан 1 кл, Алексеев Сережа 1 кл, детсад оҕото Конобулов Макс, Игнатьев Даниил 1 кл, Ефремов Эрхан, Поротов Самир, Габышев Чаҕыл, Намбаров Баир, Иванов Павел, Николаев Петр, Колесов Марсель, Молчанов Артем, Заровняев Костя, Герасимов Артемий.

Күрэхтэһии судьуйалара: 7 нүөмэрдээх оҕо спортивнай оскуолатын тустууга салаатын кылаабынай тренерэ Осипов Александр Павлович, РФ спордун маастара Дьулустан Альбертович, ССРС спордун маастара Мокрощупов Алексей Васильевич. Күрэхтэһии бырааһа Билюкина Эльза Павловна. Тустуу салаатын тренердарыттан уонна спорт оскуола салалтатын аатыттан, оҕолор төрөппүттэригэр улахан махтал, саҥа күрэхтэһиибитин кэлэн көрбүккүтүгэр. “Тустуу аргыстаах оҕо сааһым” Хатас оҕотун улахан тустуу түһүлгэлэригэр КЫНАТТААТЫН.

Дьэ, ити курдук, Хатастааҕы 7 нүөмэрдээх оҕо спортивнай оскуолата сылы түмүктүүр тэрээһиннэриттэн биирдэрэ инникигэ эрэли үөскэттэ, баар ситиһиилэри көрдөрдө, тренер, дьарыктанааччы, төрөппүт биир тыыҥҥа,биир салгыҥҥа киирэн түмсүү, сомоҕолоһуу баара билиннэ.

Наталья РУФОВА.

Хатас, 2024 сыл, ахсынньы.