Турнир көхтөөхтүк саҕаланна
Нуучча дуобатыгар сахалартан маҥнайгы ССРС спордун маастара Семен Семенович Николаев аатынан республикатааҕы нуучча дуобатыгар «Б» категориялаах турнир Күндээдэ орто оскуолатыгар үөрүүлээх саҕаланна.
Күрэхтэһии үөрүүлээх аһыллыытыгар улуус баһылыгын солбуйааччы Наталия Петрова, “Ньурба улууһун Бочуоттаах спорт бэтэрээнэ” анал ааты Николай Фокиҥҥа уонна Василий Кононовка үөрүүлээх быһыыга-майгыга туттарда. Маны сэргэ, киэн туттар, эдэр спортсмеммыт, гроссмейстер, аан дойду, Арассыыйа хас да төгүллээх чемпиона Александр Ефимовка уонна кини тренерэ Петр Ушницкайга улуус баһылыгын аатыттан сертификат туттарылынна.
Улуустааҕы спорт управление салайааччыта Роберт Алексеев, улуус баһылыга Иннокентьев А.М. аатыттан дуобат федерациятын активнай чилиэттэригэр, энтузиаст-тренер Анна Яковлеваҕа уонна Улуустааҕы спорт управление аатыттан Күндээдэ нэһилиэгин баһылыгар Яков Замятиҥҥа, оскуола дириэктэрэ Татьяна Васильеваҕа Махтал суруктары туттартаата.
Күрэхтэһиигэ барыта 142 кыттааччы, Амма, Кэбээйи, Үөһээ Бүлүү, Сунтаар, Миирнэй о.д.а улуустартан кэлэн кытта сылдьаллар. Ол иһигэр, гроссмейстердар, аан дойду, Европа, Арассыыйа чемпионнара бааллар. Күрэхтэһии сүрүн судьуйатынан СӨ дуобакка сүүмэрдэммит хамаандатын үрдүкү тренерэ, гроссмейстер Иван Токусаров үлэлиир.
Ити курдук, убаастыыр, ытыктыыр биир дойдулаахпыт спорт, бэчээт, суруналыыстыка эйгэтигэр үрдүк таһаарыылаахтык үлэлээбит Семен Николаев аатынан турнир көхтөөхтүк саҕаланна.
Ньурбатааҕы спорт управлениетын пресс-киинэ.