Петр Попов: “Николай Тарскай туһунан мин өйдөбүлүм

Номоххо киирбит тустуук, РСФСР чемпиона, ССРС хамаанданан күрэхтэһиитин кыайыылааҕа, спорт маастара Петр Егорович Попов Саха Республикатын спорка миниистиринэн үлэлии олордоҕуна Н.Н. Тарскай аатын чөлүгэр түһэриигэ улахан үлэ ыытыллыбыта. Төрөөбүт улууһугар, кини аатынан көҥүл тустууга республика чемпионата сөргүтүллүбүтэ.

Биллиилээх общественнай, политическай деятель, Саха сиригэр спорка хамсааһыны көхтөөх тэрийээччи Н.Н. Тарскай 100 сылынан тэриллибит тэрээһиҥҥэ Петр Егорович Попову көрсөн, бэйэтин санаатын үллэстэригэр көрдөстүм:

-Мин бастаан 1961 сыллаахха Калининград куоракка спортивнай обществолар күрэхтэһиилэригэр «Спартак» аатыттан кыттаммын, Сэбиэскэй Сойуус үрдүнэн бэйэм ыйааһыммар иккис миэстэни ылбытым. Ону хаһыакка эҥин таһаарбыттара быһыылаах. Онон дьоҥҥо-сэргэҕэ биллэн хааллым.

Эһиилигэр дуу, хайдах дуу, Москваҕа үөрэтэр-эрчийэр түмсүүгэ бардыбыт. Онно, биирдэ Сандуновскай баанньыкка сууна сырыттахпытына, арай биир киһи чугаһаан кэлэн сүүспүттэн имэрийэн баран: «Петр Попов диэн эн дуо?», – диэн ыйытта.

-Ээ, мин, – диэтим.

Ону мин кыратык тэйэн баран, тренербит Николай Николаевич Волковтан, ити кимий диэн ыйыттым.

Ону кини: «Николай Николаевич Тарскай», – диэн хоруйдаата.

Ити, итинэн ааста. Дьэ, онтон быдан кэлин, спорт миниистирэ буоллум. Ол кэмҥэ сымыйа сурахха олоҕуран Н.Н. Тарскай аатынан көҥүл тустууга Саха сирин биирдиилээн уонна хамаанданан бастыыр иһин чемпионата атын аатынан ыытылла турара.

Арай биирдэ үлэлиир кабинеппар Уус Алдантан хас да киһилээх бөлөх оҥостон киирэн кэллилэр. Итиэннэ, тустуук киһи спорт миниистирэ буолбутун үчүгэй диэн баран, бэйэлэрин сүрүн боппуруостарын кэпсээтилэр. Ол – Николай Тарскай биһиги биир дойдулаахпыт буолан, кини аатын чөлүгэр түһэрэргэ, көҥүл тустууга республика чемпионатын уруккутун курдук кини аатынан ыытылларыгар туруорсуу этэ. Ону мин болҕомтоҕо ылан, боппуруоһу салгыы туруорсарга сөбүлэспитим.

Ити курдук, Николай Николаевич үтүө аатын чөлүгэр түһэриигэ үлэлэр саҕаламмыттара уонна олоххо киирбиттэрэ. Билэргит курдук, чемпионат Уус Алдаҥҥа, Бороҕоҥҥо ыытыллыбыта. Н.Н. Тарскай аата чөлүгэр түспүтүгэр дьон-норуот сүрдээҕин астыммыта, санаата көтөҕүллүбүтэ. Чемпионат кэмигэр, кини төрөөбүт алааһыгар өйдөбүнньүк сэргэ туруоруллуутугар кыттыбытым. Ол кадрдарын телевизорга, анал биэриигэ көрдөрөн аһарбыттара. Кэргэнин кытта көрсөн кэпсэппитим. Сибэкки уонна өйдөбүнньүк бэлэх туттарбытым.

Н.Н. Тарскай Саха сиригэр спорка өҥөтүн үрдүк сыаналыыбын. Партия уонна правительство ыытар үлэтигэр көхтөөхтүк кыттан, спорду өрө көтөхпүтэ.

Петр ПАВЛОВ.

Ааптар хаартыскаҕа түһэриитэ.