Аһаҕас түһүлгэ кыайыылаахтары быһаарда

Сахаттан бастакы олимпийскай чемпион Р.М. Дмитриев аатынан Олимпийскай эрэл училищетын Тустууга саалатыгар 2008-2010 сс. төрөөбүт уолаттарга республикатааҕы аһаҕас түһүлгэ ыытылынна.

Көбүөргэ 14 хамаандаттан (Амма, Үөһээ Бүлүү, Бүлүү, Горнай, Мэҥэ Хаҥалас, Нам, Нерюнгри, Ньурба, Өймөкөөн, Сунтаар, Уус Алдан, Хаҥалас, Чурапчы, Дьокуускай) барыта 187 эдэр бөҕөс тахсан күөн көрүстэ.

Түмүккэ бэйэлэрин ыйааһыннарыгар кыайыылаахтарынан буоллулар: 35 кг – Женя Колодезников (Уус Алдан), 38 кг – Мичил Егоров (Амма), 42 кг – Леонард Соркомов (Чурапчы), 45 кг – Антон Голиков (Дьокуускай), 48 кг – Антон Григорьев (Сунтаар), 51 кг – Эрхан Куличкин (Дьокуускай), 55 кг – Дмитрий Данилов (Сунтаар), 60 кг – Максим Трофимов (Нерюнгри), 65 кг – Сарыал Григорьев (Чурапчы), 71 кг – Уйгун Бурцев (Дьокуускай), 80 кг – Артур Слепцов (Мэҥэ Хаҥалас), 92 кг – Айхаан Кривошапкин (Хаҥалас), 110 кг – Артур Восканян (Чурапчы).

Тренердэртэн, В.П. Керемясов аатынан Дьокуускай куорат 3 №-дээх оскуолатыттан норуоттар икки ардыларынааҕы кылаастаах спорт маастара Николай Яковлев, Уус Алдан улууһун Суоттутааҕы филиалын тренерэ, спорт маастара, СР үтүөлээх тренерэ Семен Петухов, Чурапчытааҕы спортивнай оскуолаттан спорт маастара Иннокентий Петров уо.д.а. иитиллээччилэрэ үчүгэй тустууну көрдөрдүлэр.

Күрэхтэһии түмүгүнэн бу саастаахтарга Саха сирин хамаандата талылынна.

«Дьулурҕан».