2025 сылга көрсүөххэ диэри!

2024 сыл – спорка баай ис хоһоонноох буолла. Туох баар улахан таһымнаах түһүлгэлэргэ саха спордун иитиллээччилэрэ бэйэлэрин күүстэрин холоспуттара, билиҥҥи кэмҥэ биһиэхэ спорт ханнык кэрдиискэ турарын кэрэһэлиир дии саныыбын. Биэс спортсмеммыт, төһө да атын дойдулартан буоллаллар, Парижтааҕы сайыҥҥы Олимпийскай оонньууларга кытыннылар.

Спорпут төрүт көрүҥнэригэр хапсаҕайга уонна мас-рестлиҥҥэ аан дойду чемпионаттара ситиһиилээхтик ыытыллан – республикабыт, норуоппут аата өссө төгүл ааттанна, билиннэ. Маны аҥардас күрэстэһии эрэ курдук көрбөккө, бэйэ үгэстэрин тарҕатыы, норуоттар доҕордоһууларын уонна сибээстэһиилэрин быһыытынан сыаналыахха сөп.

Хас эмэ сылы быһа бэлэмнэнэн, бэйэбитигэр «Азия оҕолоро» норуоттар икки ардыларынааҕы VIII спортивнай оонньуулары ыытан, ханнык баҕарар улахан таһымнаах күрэхтэһиини тэрийэр кыахтаахпытын көрдөрдүбүт.

Олорон кэлбит олохпут историятын умнубакка, киэн туттар дьоммутун кэриэстээн, кинилэргэ сүгүрүйэн элбэх тэрээһиннэр, күрэхтэһиилэр ыытылыннылар. Ол курдук, саха спорда сайдарыгар улахан өҥөлөөх төлөннөөх тэрийээччи уонна салайааччы Николай Николаевич Тарскай 100 сыла киэҥник бэлиэтэннэ. Быһата, Саха Республикатыгар физическэй култуура уонна спорт үрдүктүк тутуллан, салалта өртүттэн улахан болҕомто, өйөбүл оҥоһуллан, сайдыы суолун тутуста.

Хаһыаппытыгар киирдэххэ, үөһэ ахтыллыбыт улахан таһымнаах күрэхтэһиилэр, тэрээһиннэр барыта сурулуннулар, сырдатылыннылар. Онон кумааҕы бэчээт быһыытынан барыта суруллан, архыыптарга, библиотекаларга ууруллан, история кэрэһитэ буолар аналын толорон кэллэ.

Хаһыат киэҥ араҥаны хабыытыгар биллэр ааптардар, улуус хаһыаттарын суруналыыстара, эдэр корреспонденнар күүс-көмө, өйөбүл буоллулар. Холобур, Тааттаттан Вера Канаева, Хаҥаластан Уйбаан Уйгуров, Амматтан Михаил Алексеев, Зоя Пахомова Горнайтан Вячеслав Алексеев, Михаил Мордовской-Михута, Намтан Анатолий Софронов, Бүлүүттэн учуутал Марианна Васильева, Өлүөхүмэттэн Родион Данилов-Ородьумаан, Хатастан Наталья Руфова, Майаттан Степан Андреев, Дьокуускайтан Виталий Слепцов, Дмитрий Егоров, Петр Яковлев, Константин Стручков уо.д.а. сыл устата «Дьулурҕаны» кытта ыкса ситимнээхтик үлэлээн кэлбиттэрин бэлиэтиибин. Барыларыгар барҕа махталбын тиэрдэбин.

Махтанабын, биһиги хаһыаппыт суруттааччыларыгар, ааҕааччыларбытыгар! Эһиги эрэлгитин толорорго, хаһыат өссө ааҕыллымтыа буоларыгар, дьон киэҥ араҥата сэҥээрэрин, кыттыһарын туһугар дьулуһабыт.

Олох бэйэтин хардыытынан баран иһэр. Эһиилги, 2025 сыл сүрүн күрэхтэһиитэ – Тааттаҕа ыытыллар Манчаары XXII оонньуулара буолуохтара. Оонньуулары көрсө номнуо хаһыаппытыгар анал рубрика аһыллан, сырдатыы үлэтэ саҕаламмытын көрбүт, аахпыт буолуохтааххыт. Ону тэҥэ 25 сыллааҕыта (2000 сыл тохсунньу 14 күнүгэр) “Дьулурҕан” бастакы нүөмэрэ бэчээттэнэн тахсыбыта – үбүлүөйдээх кэрэ бэлиэ түгэн.

Барыгытын кэлэн иһэр Саҥа дьылынан эҕэрдэлиибин! Хаһыат ыытар үлэтигэр көхтөөхтүк кыттаргытыгар баҕарабын!

Петр ПАВЛОВ, «Дьулурҕан» редактора.