Үгэскэ кубулуйбут Чусовской боксаҕа турнирыгар

Ахсынньы 3-7 күннэригэр  Ньурба улууһун Октябрьскай нэһилилиэк А.И. Пахомов аатынан спорт саалатыгар Сэбиэскэй Сойуус Геройа Н.Н. Чусовской аатынан боксаҕа республикатааҕы турнир ыытылынна.

Үгэскэ кубулуйбут турнир номнуо үйэ аҥара кэриҥэ ыытыллан кэллэ. Барыта 9 улуустан сүүс боксер кыттыыны ылла. Бокса көрүҥэ Ньурба улууһугар биир бастыҥ көрүҥ буолар. Бу көрүҥҥэ ыытыллар күрэх биһиги ытыктыыр биир дойдулаахпыт, улуу тренер Артур Иннокентьевич аатынан спорт саалатыгар да ыытыллыыта, атын улуустан кэлбит оҕолорго биир ураты, бу көрүҥҥэ дьарыктанар оҕолорго өссө эппиэтинэстээх буолан бирэдэ. Маны тэҥэ, күрэхтэһии үөрүүлээх аһыллыытыгар Ил Түмэн ыччат дьыалатын, физическэй култуура уонна спорка кэмитиэтин салайааччыта, төрөөбүт Октябрьскай нэһилиэгэр ыытыллар турнирга Георгий Балакшин эҕэрдэ тылын эттэ.

Күрэхтэһии чэрчитинэн Сэбиэскэй Сойуус Геройа Николай Николаевич Чусовской скверыгар уонна Артур Иннокентьевич Пахомов памятнигар сибэкки дьөрбөтүн ууруу ыытылынна.

Бу турнир бэйэтэ киэҥ историялаах, бокса көрүҥэр үгүс спортсменнары иитэн-такайан таһаарбыт күрэх буолар. Онтон билиҥҥи кэмҥэ дойдуга бэриниилээх буолуу, кини Геройдарын билии өссө сытыырхайан турар кэмигэр бу күрэх өссө икки бүк эппиэтинэстээх, кэлэр кэнчээри ыччакка үгүһү үөрэтэр сыаллаах буолар.

Хас ыытыллар турнир ахсын өрүү өйөбүл буолан, улууска спорт, бокса сайдыытын туруулаһар нэһилиэк баһылыктара, тэрилтэлэр, урбаанньыттар өрүү болҕомто уураллар. Үгүс элбэх кыттааччыларга өйдөбүнньүк бэлэхтэр, номинациялар тутарылыннылар. Ньурба улууһун бокса федерациятын анал бирииһин: Макаров Эрсан (Сунтар), Саввинов Айаал уонна Матвеев Андрей (икиэн Убайаан орто оскуолата), Габышев Ариян (Үөһээ Бүлүү). Ньурба куоратын баһылыга Геннадий Васильевич Игнатьев туруорбут телевизор бирииһэ “Турнир бастыҥ боксера” анал аат хаһаайына Дамир Андреевка (Ньурбатааҕы элбэх хайсхалаах гимназия) туттарылынна. Октябрьскай нэһилиэк баһылыга Семен Александрович Корякин телевизор бирииһэ – эдэр, кэскиллээх боксер Дарсен Прокопьевка (Антоновка орто оскуолата) туттарылынна.

Октябрьскай нэһилиэк спортзалын туппут урбаанньыттар, быраттыы Терентьевтар, Владимир Терентьев киирсэр ыйааһыныгар 63,5 кг анал бириистэрин биир дойдулаахтара – Львов Герман тутта. Антоновка, Ньурба боксатын саҕалааччылартан биирдэстэрэ, Аан дойдуга ааттаппыт киэн туттар дьоммут Нестер Пахомов, Артур Пахомов ааттарынан анал бириистэри дьиэ кэргэттэрэ Мэҥэ-Хаҥаластан Александр Сергучевка уонна Өлөөнтөн Айаал Новгородовка анаатылар.

Герой Николай Чусовской аатынан үгэскэ кубулуйбут республикатааҕы боксаҕа турнир түмүктүүр чааһыгар бокса ветераннарыгар, судьуйаларга Ньурбатааҕы спорт управление аатыттан салайааччы Роберт Александрович Алексеев Махтал суруктары туттартаата. Улуустааҕы бокса федерациятын салайааччыта Сергей Валерьевич Никифоров хаһыс да сылын сүрдээх таһаарыылаахтык үлэлии сылдьар, улууска биир бастыҥ үлэлээх федерациялар кэккэлэригэр киирсэр. Мантан салҕыы, бу күрэхпит инникитин торумнаан, быһаарсан Б категориялаах боксаҕа республикатааҕы турнир быһыытынан уруккутун курдук ыытыллыан сөбүн улуустааҕы спорт управление туруорсан, таһымын өссө үрдэтэр былааннаах. Бу курдук, боксаҕа биир өр сылларга ыытыллан кэлбит турнир Ньурба сиригэр-уотугар таһаарыылаахтык, үгүс дьон сэҥээриитин ылан ыытылынна.

Ньурбатааҕы спорт управление пресс-киинэ.