Үбүлүөйгүтүнэн, Андрей Афанасьевич!

Ааһан эрэр сылга В.Н. Кычкин дириэктэрдээх Дьокуускай куорат 5 №-дээх спортивнай оскуолата 25 сыллаах үбүлүөйүн туолла. Кэрэ бэлиэ түгэнинэн эҕэрдэлээн туран, бу оскуола үөрэтии-итии боппуруостарыгар дириэктэри солбуйааччыта, көҥүл тустууга ССРС спордун маастара, биллиилээх коллекционер уонна “Дьулурҕан” хаһыат доҕоро Андрей Филиппов – Хомпоруун хас да сыллааҕыта бэчээккэ анаан биэрбит ахтыытын үбүлүөйгэ сөп түбэһиннэрэн таһаарарга сананным.

Спорт эйгэтигэр киирэн кинини бастаан көрөн уонна Өлүөхүмэттэн сылдьарын билэн баран, ини-бии Петр уонна Алексей Копыловтарга маарыҥнатан, аймахтарыҥ дуо диэн ыйытан турардаахпын. Уонна үлэлиир кабинеппар кэлэ сырыттаҕына, Копыловтар хаартыскалардаах халандаары анаан туттаран, хаартыскаҕа түһэрбитим.

Аҥардас дьүһүннэриттэн көрөн таайбытым сөп эбит, сыыстарбатахпын, Андрей Афанасьевич уонна бырааттыы Копыловтар аймахтыы эбиттэр.

– Оҕо сылдьан хайыһарга оройуоҥҥа уонна республикаҕа хаста да кыайбытым, призердаабытым, спортивнай туризмҥа уонна ориентированиеҕа эмиэ.

1979 сыллаахха Чурапчы спортивнай оскуолатын бүтэрбитим, биир сыл оскуола комсомолун секретара этим. Норуоттар икки ардыларынааҕы кылаастаах спорт маастардара Егор Алексеев уонна Михаил Протопопов, ССРС спордун маастардара Александр Мартынов, Александр Стрекаловскай, Петр Саввин, Тарас Макаров, Артур Петров буолан бары биир выпуспут.

Армияҕа сылдьан син тустубутум. ЗабВО иккис призера, юниордарга кыайыылааҕа буолбутум (иккиэннэрэ ССРС спордун маастара нуормалаах этилэр), Ерофей Хабаров турнирын кыайан маастары толорбутум, онтубун 1983 сылга СГУ аһаҕас чемпионатын кэмигэр туттарбыттара, Юрий Андреев булан кэлбит этэ, корочкабын.

Оттон санаам көтөҕүллэн ити чемпионаты кыайан, Н.Н. Тарскайга путевка ылбытым, ол финалга алтыс буолбутум (ыйааһын түһэрбэккэ 62 кг тустубутум, нэһиилэ киллэрбиттэрэ 57 путевкалаах диэн, Петр Бурцевка 5-2 хотторон иһэн, туше баран көтөн хаалбытым, очконан хотторбутум эбитэ буоллар, үсүһү былдьаһыам этэ, ити миэстэни мин кыайбыт уолум ылбыта).

1979 сылга Тарскай зонатын кыайбытым, Покровскайга буолбута, армияҕа баран хаалан финалга тустубатаҕым. Биир сыл (1984 быһыылаах этэ) Кыайыы күнүн эстафетатыгар Артур Феофанов кэнниттэн бастакы этапка иккистээбитим. 1983, 84, 85, 86, 87 сылларга математическай факультет хайыһар десаныгар сылдьыбытым, үс бүтэһик сыл командирынан.

Спорка аҕам Афанасий Яковлевич Филиппов – Чоллоон син ситиһиилэрдээх. Кини бэйэтин кэмигэр хайыһарга ССРС спордун маастарын нуорматын толорон баран, күрэхтэһэн тохтоон хаалан ылбатаҕа. САССР, Дальнай Восток уонна Сибиир зонатын хас да төгүллээх кыайыылааҕа уонна призера, ССРС чемпионатын кыттыылааҕа – икки дистанциаҕа 30 иһигэр киирбитэ, эстафетаҕа 5-с буолбута, Саха сирин Спартакиадатын тустууга, хапсаҕайга, чэпчэки атлетикаҕа кыайыылааҕа, призера. Пенсияҕа тахсан баран оҕолору дуобакка дьарыктаабыта, биир да бастакы да разряда суох Өлүөхүмэҕэ кини дьарыгынан 15 РФ кмс, 30-тан тахса 1 разрядтаах дуобаччыттар баар буоллулар, Фролова Виктория, Михайлова Елена (Хоро) – дуобат фестивалын кыайыылаахтара, призердара, Нахова Ксения (Кыыллаах) – эдэрдэргэ СР бастакы нүөмэрэ, Россия кыайыылааҕа, призера этэ. Аҕам бэйэтэ 65 сааһыгар РФ кмс буолбута…

Алеша уонна Петя Копыловтар олох кыра эрдэхтэриттэн кыахтара-күүстэрэ таһынан тохто сылдьар кырачаастар этэ… Ким да сүгүн дьарыктаабатар да, тугу барытын кыайан хамсанар этилэр. Күрэхтэһиилэргэ мэлдьи кыайыылаах буолар этилэр, финалга көрүстэхтэринэ уочаратынан кыайсар үһүлэр.

Биирдэ илэ кулгаахпынан истэн турабын: билигин эн кыайар уочаратын диэн хайалара эрэ эппитин. Ол да буоллар, син биир бырахсан кылбаҥнатар этилэр. Быраатым Яков Филиппов син бэйэтин кэмигэр биллэр тустуук, 1985 сылга ССРС чемпионатыгар Якутскайга кыттыбыта, Егшатян диэн армяны прогибынан быраҕан, стадиону уһугуннарбыта, очконан лаппа баһыйан иһэн иккистээн прогибтаары накрываниеҕа түбэһэн туше барбыта. Оттон Алексей Диодоровтыын тоҕо эрэ сүгүн тустубатаҕа. Син кыахтаах буолан, үс төгүл кэлии киһи да буоллар, Мэҥэ Хаҥалас сыл чулуу спортсмена буолбута. Өлүөхүмэттэн син элбэх оҕону (үксүн Хороттон) Харатыгар аҕалан, син хамсанар тустууктар оҥортоото. Кини мин аҕам иитиэх эдьиийин оҕото. Аҕам аҕата, убайа сэриигэ барбыттарыгар, кинини ийэтин балта иитэ ылбыт (Үөһээ Бүлүү Туобуйатыгар). Онтон Хороҕо көһөн киирбиттэр. Онон Яков көнөтүнэн да, иитиэҕинэн да племянник буолар аҕабар.

Копыловтар мин ийэбинэн племянниктарым, үһүс-төрдүс көлүөнэҕэ…

Петр ПАВЛОВ.