Саамай элбэх кыттааччы 57 киилэҕэ мустубут

Россия спордун маастара, Ил Түмэн депутатынан үлэлии сылдьыбыт, саха тустуутугар улахан өҥөлөөх Александр Крылов кэриэһигэр көҥүл тустууга Бүтүн Россиятааҕы турнир үһүс сылын ыытыллар. Турниры Александр Владимирович доҕотторо уонна төрөөбүт Өймөкөөнүн улууһа тэрийэн ыыталлар.

Быйылгы турнирга 18 хамаандаттан барыта 155 бөҕөс сэрэбиэйи ааста. Ол курдук, түһүлгэҕэ Амурскай уобалас, Бурятия, Забайкальскай кыраай, Иркутскай, Кабардино Балкария, Кемерово, Красноярскай, Москва, Московскай уобалас, Новосибирскай, Оренбург, Приморскай кыраай, Хотугу Осетия, Тыва, Хабаровскай уонна Монголия, Таджикистан бөҕөстөрө күөн көрсөллөр.

Кинилэртэн үгүстэрэ өссө улуу тренер Д.П. Коркин аатынан норуоттар икки ардыларынааҕы турнирга кыттан баран, салгыы хаалан анал үөрэтэр-эрчиллэр түмсүүгэ кытыннылар.

Саамай элбэх кыттааччы 57 киилэҕэ мустубут. Састаап даҕаны куһаҕана суох. Федор Постников, Айаал Белолюбскай, Жаргал Баяндуев, Амир Чамзын, уо.д.а. биллэр-көстөр бөҕөстөр күөн көрсүөхтэрэ.

Кылаабынай судьуйанан норуоттар икки ардыларынаа5ы категориялаах судьуйа Солтан Засеев (Пермь), оттон кылаабынай секретарынан Бүтүн Россиятааҕы категориялаах судьуйа Василий Уйгуров (Дьокуускай) үлэлиэхтэрэ.

Күрэхтэһии – программа быһыытынан күнүс 11:00 чаастан саҕаланар. Турниры үөрүүлээхтик аһыы 14:00 чаастан буолуоҕа. Оттон өрөбүл күн күрэхтэһии эмиэ 11:00 чаастан «санааны уоскутар» бөлөх тустууларынан саҕаланыаҕа.

Күрэхтэһиигэ киирии – босхо. Бука бары тустууга!

«Дьулурҕан».