Хатастар “Сын Полкабыт”

Кулун тутар 27 күнүгэр 1977 сыл Дьокускайдааҕы, республиканскай ипподромҥа “Хатас” сопхуоһун 4 саастаах тураҕас ата Буран икки эргиири (3200 м) 4 мүнүүтэ 23,4 сөкүүндэнэн кэлэн кыайан турар. Оннук улахан суолталаах кыайыы да буолбатар, чуолаан хатастарга бэлиэ сүүрүү буолбута.

Бу күн республика ааттаах тренердэрин: Свинобоев И.С. (Герой Охлопков аатынан сопхуос, Томпо), Прохоров В.П. (Нөмүгү), Ноговицын П.П. (Нам), Тимофеев В.В. (Тулагы), Титов Ю.Г. (Ленин аатынан сопхуос, Мэҥэ-Хаҥалас), Ноговицын Е.П. (М.Горькай аатынан сопхуос, Мэҥэ-Хаҥалас) кэккэлэригэр эдэр кэскиллээх тренер Алексей Гаврильев аата бастакытын аатаммыта.

Бу күн кини баайбыт аттара 8 төгүлүн биэтэккэ бастакыннан кэлбиттэрэ: Канарейка (4800 м – 6 мүн 43,2 сөк), Лира (1600 м), Ислан (3200 м – 4 мүн 05 сөк), Искра (3200 м – 4 мүн 05,8 сөк), Квадрат (1200 м – 1 мүн 28 сөк), Точка (1200 м – 1 мүн 31,3 сөк), Сардана (1600 м – 1 мүн 59,9 сөк), Консул (1600 – 1 мүн 58 сөк).

Иккис миэстэлээхтэр: Кумарка (800 м – 1 мүн 02 сөк) уонна Алмаз (800 м – 59 сөк). Өскөтүн 16 сүүрүү ыытыллыбытыттан, Алексей Алексеевич-Сын Полка баайбыт сүүрүктэрэ 10 бириистээх миэстэҕэ тиксибиттэрэ улахан ситиһии.

Бэс ыйын 9 күнэ 1979 сыл номнуо уопутурбут тренергэ биир долгутуулаах түгэнинэн буолар. Ити күн Саха сирин үтүөлээх тренерэ Николай Ситников аатынан бириискэ ОПХ ЯНИИСХ, ол саҕана Орджоникидзевскай оройуон (билигин Хаҥалас улууһа) хаһаайыстыбатыттан Дьаҕылтай, Герой Попов сопхуоһуттан Сирена (Мэҥэ Хаҥалас улууһа) уонна хатастар сулустара Лира сүүрэр суолга тахсаллар. Дистанциялара да уһун, 7000 миэтэрэ, инники маннык уһуҥҥа хаһан да аттар бара иликтэрэ. Алексей Гаврильев олус эрэнэн киллэрбитэ диэн Хатас кырдьаҕас дьоно кэпсээччилэр. Программаны да көрдөххө, Лира биэтэккэ чорбойон Сиренаны баар суоҕа 0,5 сөкүүндэнэн кыайбыт. Бириэмэтэ – 8 мүнүүтэ 50,2 сөкүүндэ. Бу рекорд билиҥҥээҥэ диэри турара, Алексей Алексеевич-Сын Полка чаҕылыс гыммыт күнүнэн ааҕабыт.

Төрөөбүт, үөскээбит “Хатас” сопхуоһун аатын элбэхтэ ааттатан, кэлин олус тахсыылаахтык дойдутугар биригэдьииринэн үлэлээн хамсаан биһиги “Сын Полкабыт” убаастабылы ылбыта.

Михаил МОРДОВСКОЙ.

Бэрдьигэстээх, Горнай.