Харысхан Баппаҕай: «Никиталыын ахсааммыт 2:1 буолла»

Дьокуускай. «Өрөгөй» Спорка бэлэмнэнии киинигэр Александр Крылов кэриэһигэр Бүтүн Россиятааҕы үһүс турнир ыытыллан түмүктэннэ. Күрэхтэһиигэ 18 хамаандаттан барыта 155 бөҕөс күөн көрүстэ. Ыарахан ыйааһыҥҥа кыайыылааҕынан биир дойдулаахпыт Харысхан Баппаҕай буолла. Кини бүтэһик быһаарыылаах хапсыһыыга Никита Хабаровы кыайда.

Наҕараадалааһын кэнниттэн кыайыылааҕы көрсөн, аҕыйах ыйытыыга хоруйдууругар көрдөстүм.

-Харысхан, бастатан туран, эйигин кыайыыгынан эҕэрдэлиибин! Бэйэҥ тускунан кылгастык билиһиннэр эрэ.

-Мин Үөһээ Бүлүү Тамалакааныттан төрүттээхпин. Аҕам спорт фаната этэ. Кыра эрдэхпиттэн миигин тустууга биэриэн баҕарара. Бииргэ төрөөбүт алтыабыт: биэс – уол, биир – кыыс. Дьиэ кэргэнтэн үс оҕо спордунан дьарыктанабыт. Соторутааҕыта 24 сааспын туолбутум.

-Эн билигин Хотугу Осетияҕа бааргын дии…

-Да. Манна, Р.М. Дмитриев аатынан Олимпийскай эрэл училищетын үөрэнэн бүтэрэн баран, биирдэ Хотугу Осетияҕа эрчиллэ бара сылдьан, тренер убайбынаан онно олохсуйарга, дьарыктанарга быһаарыммыппыт. Хотугу Осетиятааҕы государственнай университекка үөрэнэбин уонна тустуунан дьарыктанабын. Билигин төрдүс курс студенабын. Тустууга тренерим – осетин Вячеслав Владимирович Багаев.

-Оттон манна, спортсмен быһыытынан үүнэн тахсаргар кимнээххэ үөрэммиккиний?

-Тустууга бастакы тренерим Алексей Сергеевич Некрасов. Оҕо сылдьан дэриэбинэбэр, хапсаҕайынан дьарыктанарбар тренерим Эльдар Эдуардович этэ.

-Спорка бастыҥ көрдөрүүлэриҥ.

-Оттон ити, манна буолбут Россия студеннарга чемпионатыттан төлө баран, аһыллан туһуннум. Онтон кынаттанан салгыы кыра-кыралаан эбэн иһэбин дэнэбин. санаабар. Уонна манна кэлиэм аҕай иннинэ соторутааҕыта, Владикавказка студеннар икки ардыларыгар Бүтүн Россиятааҕы рейтиннээх турнирга бастаабытым.

-Чугастааҕы кэмҥэ ханна кыттар былааннааххыный?

-Баттастахпына, Умаханов турнирыгар кыттыам. Бу ый 14-15 күннэригэр Дагестаҥҥа буолуохтаах.

-Харысхан, билигин бэйэн үрдүгүҥ уонна ыйааһынын хаһый?

-Үрдүгүм 190 см, ыйааһыным 108 кг.

-Ээ, оччоҕо 125 киилэҕэ кыра эбиккин дии. Тоҕо 97 кг ыйааһыҥҥа тустубаккын?

-Кырабын аһаа. Инникитин үчүгэйдик күүспүн-уохпун хачайданан, ыйааһыммын таһаарыахпын наада.

-Оччоҕо, инники тустууларгын ыарахан ыйааһыҥҥа былаанныыр буоллаҕын.

-Да, улахан ыйааһыҥҥа тустар санаалаахпын.

-Бүгүн быһаарыылаах хапсыһыыга Никита Хабаровы кыайдыҥ. Сирэй көрсөн ахсааҥҥыт хаһый?

-Ити, мин ааҕыыбынан үһүс киирсиибит быһыылаах. Бастаан Н.Н. Тарскай аатынан республика чемпионатыгар киниэхэ хотторбутум. Оттон быйыл Россия студеннарга чемпионатыгар уонна билигин кыайдым. Онон ахсааммыт 2:1, мин туһабар буолла. Никиталыын чугастыы табаарыстыыбыт. Этэргэ дылы, көбүөргэ утарсааччыларбыт, олоххо – доҕордуубут. Олимпийскай эрэл училищетыгар бииргэ үөрэммиппит. Куруук бииргэ сылдьабыт.

–Өссө төгүл эҕэрдэ! Инники өссө ситиһиилэри баҕарабыт.

Петр ПАВЛОВ.

Ааптар хаартыскаҕа уонна видеоҕа түһэриитэ.