Быйылгы түһүлгэ уратылара

Бырааттыы Ноговицыннар бириистэригэр 2024 сыллааҕы XIX күрэхтэһиилэрэ кэккэ уратылаах буолуохтара.

Эйэҕэс сыһыаннаах, эр хоһуун дьоннордоох,

Эрэмньи кыымнардаах, эргиччи үөрүүлээх,

Эҕэрдэ алгыстаах, эйэлээх олохтоох,

Эрчимнээх түһүлгэ, үйэлээх буолуохтун.

Бу дьыл, сэтинньи 23-24 күннэригэр, “Модун” спортивнай комплекс уораҕайыгар бырааттыы Ноговицыннар күрэхтэһиилэрэ тэриллэн ыытыллыаҕа.

Быйылгы күрэхтэһии – Россия үрдүнэн “Дьиэ кэргэн”, Саха сиригэр “Оҕо”, Дьааҥы улууһугар “История” сылларыгар уонна уолаттар аҕалара, тыыл, үлэ бэтэрээнэ, Дьааҥы улууһун Бочуоттаах олохтооҕо, “Ытык Аҕа” бэлиэ кавалера, Дулҕалаах төрүт кырдьаҕаһа, сир түннүгэ оҕонньор Василий Павлович Ноговицын 2004 сыллаахха “Азия оҕолорун оонньууларын” уотун ыраах Дьааҥы сиригэр “Киһилээх” хайатыгар саҕан ылан умаппыт бэлиэ түгэнэ – 20 сыла буолбутугар ананар. Ону таһынан, Ноговицын аймахтар барыта холбоон 265 сыл учууталынан үлэлээн “Династия педагогов РС(Я)” бэлиэни ылбыт сылларыгар ананар.

Ханнык баҕарар күрэхтэһии ыытыллар тэрээһинэ уонна тэтимэ, турнир саамай тутаах киһититтэн, судьуйаттан уонна суруксут судьуйаттан олус тутулуктаах буолар.

Күрэхтэһии сүрүн судьуйатынан, норуоттар икки ардыларынааҕы кылаастаах судьуйа Андрей Яковлев ананан үлэлиэҕэ.

Күрэхтэһии быйылгы бириистэрэ.

Дьааҥы улууһун Аҕа баһылыга Иванов В.М. туруорар анал бириистэрэ:

Күрэхтэһии кыайыылаахтарыгар, бастакы, иккис, үһүс миэстэлэргэ – 25, 15, 10 тыһыынча сууммалаах сертификаттар туттарыллыахтара.

Бырааттыы Ноговицыннар уонна кинилэр дьиэ кэргэттэрин ааттарыттан ыйааһын аайы бастаабыт уолаттарга бэйэлэрин анал бириистэрин туттарыллыахтара:

57 кг – Михаил Васильевич Ноговицын бэйэтин аатыттан харчынан анал бирииһэ;

65 кг – Моисей Васильевич Ноговицын кыргыттара, аҕалара быйыл 65 сааһын туолбутунан сибээстээн бэйэлэрин анал бириистэрэ – омук саата;

75 кг – Трофим Васильевич Ноговицын бэйэтин анал бирииһэ – 400 доллар;

85 кг – Валентин Васильевич Ноговицын харчынан бэйэтин анал бирииһэ;

95 кг – Василий Васильевич Ноговицын дьиэ кэргэнин аатыттан харчынан анал бириис;

95-тэн үөһэ кг – Бырааттыы Ноговицыннар ийэлэринэн убайдара Мандров Николай Семенович харчынан бэйэтин анал бирииһин туттарыаҕа.

Икки ыйааһыҥҥа (75 киилэҕэ диэри уонна 75 киилэттэн үөһэ ыйааһыҥҥа) муҥур кыайыылаахтар анал бириистэрэ.

Дьааҥы улууһун Аҕа баһылыгын (Иванов В.М.) аатыттан икки ыйааһын кыайыылаахтарыгар – 100-түү тыһыынча харчы (сертификат) туттарыллыаҕа.

Ону таһынан кыайыылаахтарга – сымнаҕас бөрө тириитэ санныларыгар кэтэрдиллиэҕэ уонна суруктаах чорооннор илиилэригэр туттарыллыахтара.

Саҥа сүүрээн

Иккис миэстэ ылбыттарга (75 киилэҕэ уонна 75 киилэттэн үөһэ) – Ноговицын ыал күтүөттэрин ааттарыттан анал бириистэрэ харчынан бириис туттарыллыаҕа.

Быйылгы турнир атына диэн, алта ыйааһын кыайыылаахтара уонна бириискэ тиксибиттэрэ көбүөргэ тахсан сүүйүүлээх билиэт (лоторея) тардыахтара.

Ол курдук, кыайыылаахтарга анаан Моисей Васильевич Ноговицын үөрэннээччитэ, Степанов Иван Иванович (урбаанньык), учууталын Моисей Васильевич быйыл 65 сааһын үбүлүөйдээх сылынан – 100 тыһыынча уу харчынан анал бирииһин туруорда.

Иккис миэстэлээхтэр – 50 тыһыынча (сертификат), Верхоянскай куорат баһылыга Садовников Михаил Михайлович туруорбут бирииһин тардыахтара.

Үһүс миэстэлэлээхтэр – 20 тыһыынча (сертификат) Чөрүмчэ нэһилиэгин баһылыга Слепцов В.П. анаабыт бирииһин тардыахтара.

Алта ыйааһыҥҥа – “Кыайыыга дьулуурун иһин” диэн анал бириис баар буолуоҕа.

Дьааҥы бастыҥ хапсаҕайдьыта – Дьааҥы улууһун Ил Тумэн дьокутаатын Сивцев С.А. аатыттан анал бириис.

Дьааҥы кэскиллээх хапсаҕайдьыта – анал бириис.

Дулҕалаахтан төрүттээх бастыҥ тустуукка туспа бириис.

Ону таһынан анал бириистэр баар буолуохтара – турнир бастыҥ хапсаҕайдьыта, кыраһыабай бастыҥ быраҕыы, эдэр кэскиллээх тустуук, бастыҥ судья, бастыҥ суруксут уо.д.а.

Атын улуустар бэйэлэрин тустууктарыгар анал бириистэрин эмиэ аныыллара былааннанар.

Күрэхтэһии былаана:

Сэтинньи 23 күнэ:

10:00 – 15:00 – бары ыйааһыннарга хапсыһыылар саҕаланыылара;

15:00 – 15:30 – күрэхтэһии үөрүүлээх аһыллыыта;

15:00 – 19:00 – бары ыйааһыннарга салгыы хапсыһыылар.

Сэтинньи 24 күнэ:

10:00 – 14:00 – бары ыйааһыннарга кыайыылаахтары быһаарсыы түгэннэрэ, икки ыйааһыҥҥа муҥутуур кыайыылаахтары быһаарсыы хапсыһыылара, наҕараада туттарыылара, кыайыылаахтары анал бириистэринэн чиэстээһин.

Дмитрий ЕГОРОВ-Амид.

Дьокуускай.