Билсиҥ, эдэр спортсмен Марсен Колесов

Марсен Колесовка 2024 сыл үчүгэй түмүктэрдээх ааһан эрэр. Кини өссө оҕо эрдэҕиттэн чэпчэки атлетиканан, хайыһарынан дьарыктаммыта. Оттон кэнники кэмҥэ хотугу многоборьенан сөбүлээн эрчиллэр. Спорт бу көрүҥэр уонна атах оонньуутугар номнуо Саха Республикатын спордун маастара. Ити нуормалары Марсен өссө 18 саастааҕар толорбута.

Сиһилии соҕус билиһиннэрдэххэ, Уус Алдан Сыырдааҕар үөрэнэр сылларыгар физкултуура учуутала Семен Васильевич Румянцев, оттон аҕатын дойдутугар Бүлүүгэ үөрэнэр сылларыгар Инга Александровна Архангельская салалталарынан дьарыктаммыта. Оскуолаҕа үөрэнэр сылларыгар чэпчэки атлетикаҕа уонна хайыһарга нэһилиэк уонна улуус күрэхтэһиилэригэр ситиһиилээхтик кыттара.

Өссө 2017 сыллаахха Бүлүү хамаандатыттан Дьокуускайга кэлэн Ил Дархан кубогар күрэхтэһиигэ бастакы миэстэни ылан, “Орленок” лааҕырга сынньаммыта. Салгыы спорка таптала угуйан, Алданнааҕы спорт оскуолатыгар үөрэнэн-эрчиллэн, хайыһарга бэйэтин саастыылаахтарыгар республика чемпиона, призера буолбута.

Билигин Марсен – Чурапчытааҕы физическэй култуура уонна спорт институтун 4-с курсун студена. Манна кини биллиилээх тренер Иван Иванович Чиркоевка түбэһэн, аны атах оонньуутунан дьарыктаммыта. Иллэрээ сыллаахха “Юность” стадиоҥҥа ыытыллыбыт СР атах спордугар федерациятын кубогар ситиһиилээхтик кыттан, спорт маастарын нуорматын толорбута. Итинник эрчиллэ сырыттаҕына, Марсены хотугу многоборье тренерэ Альберт Федорович Иванов бэлиэтии көрөн, бэйэтигэр ыҥырбыта. Тыыппалаах уол аны спорт бу көрүҥүнэн эрчиллэ түһээт, сотору Саха сирин спордун маастарын нуорматын толорор.

Дьэ, итинник дьаныардаахтык, ылларан туран дьарыктанан, республика сүүмэрдэммит хамаандатыгар киирэн быйыл Красноярскайга ыытыллыбыт хотугу многоборьеҕа Россия эдэрдэргэ күрэхтэһиитигэр кыттыбыта. Күрэхтэһии биэс көрүҥҥэ (куобахтаан ыстыныы, 3 км сүүрүү, аркааны быраҕыы, сүгэни быраҕыы, наартаны ойуу) ыытыллыбытыгар барытыгар эриэ-дэхси көрдөрүүлэнэн, маннык бастакы дьоһун сырыытыгар аны уолбут хотугу многоборьеҕа Россия спордун маастарын нуорматын толорор.

Марсен Колесов билиҥҥитэ биир киэн туттар ситиһиитинэн, саас Нерюнгрига ыытыллыбыт Саха Республикатын норуоттарын кыһыҥҥы спартакиадатыгар кыттыы буолар. Ол курдук, спартакиада программатыгар киллэриллибит хотугу многоборье көрүҥэр аркааны быраҕыыга бастыҥ көрдөрүүлэммитэ, эбиитин өссө кини таба быраҕыылара уһулуччу буолбуттара. Бу кыайыытынан кини Уус Алдан улууһун хамаандатыгар кыһыл көмүс мэтээли аҕалбыта.

Билигин эдэр талааннаах спортсмен бэйэтин өйүн-санаатын сахалыы многоборьенан дьарыктанарга уурар. Аҕыйах хонуктааҕыта “Өрөгөйгө” ыытыллыбыт Саха Республикатын сахалыы многоборье федерациятын хамаанданан маҥнайгы кубогар бастакы улахан сүрэхтэниитин ааста. Сүүрбэтин эрэ ааспыт уол, төһө да бириистээх миэстэҕэ киирбэтэр – ыстаныыга, сүүрүүгэ, тутум эргииригэр куһаҕана суох көрдөрүүлэнэн, специалистар болҕомтолорун ылла.

Марсен Колесов сүрүн торумунан – эһиил сайын Тааттаҕа ыытыллар Манчаары оонньууларыгар кыттыы буолар.

Кини Бүлүү улууһугар төрөөбүтэ, спорка такайыыны Уус Алдаҥҥа, Бүлүүгэ, Алдаҥҥа, Чурапчыга барбыта. Бу талааннаах уолга болҕомто ууруллара, сайдарыгар-үүнэригэр күүс-көмө, өйөбүл буолуу эрэйиллэр.

Петр ПАВЛОВ.