Бары туруннахпытына, оонньууларбытын ситиһиилээхтик ыытыахпыт

Оонньууларга бэлэмнэниигэ улууспут баһылыгын дьаһалынан 21 хамыыһыйа тэриллэн турар. Тэрийэр кэмитиэккэ 19 тус-туспа үлэлээх хамыыһыйалар киирэн тураллар. Бары дьүөрэлэһэн бииргэ үлэлиибит, диир, Манчаары оонньууларын дирекциятын салайааччы Петр Егорович Захаров.

Манна, улуус хас биирдии салааларын, тэрилтэлэрин салайааччылара кытта кыттыһаллар. Бу хамыыһыйалартан оонньуу хайдах барара сүрдээх тутулуктаах. Аҥардас оонньууларга кытта, тэрээһини тэрийэ 7862 киһи кэлэр эбит.

Бу Тааттаны, оонньуулары эрэ көрө кэлэр дьону аахпакка туран. 1752 спортсменнарбытын, бары финалистар кэлэллэр. 324 судьуйа кэлэр. Ону таһынан улуустар бэрэстэбиитэллэрэ кэлэллэр. Ону таһынан көрдөрөр-иһитиннэрэр тэрилтэ үлэһиттэрэ. Аҥардас “Саха” НКИК 150 киһини ыытаары олорор. Быһа эфири оҥоруохтара, оонньуулары устуохтара. Ис дьыала сотрудниктара кэлиэхтэрэ. Ыксаллаах-быһыы майгы сулууспатын үлэһиттэрэ кэлиэхтээхтэр. Ону тэҥэ быраастар. Кинилэр бары оонньуулар туох да саахала суох ыытылларын хааччыйыахтара. Ити дьону барытын араас эбийиэктэрбитинэн түһэриэхтээхтэр. Бу дьон Таатта туһунан үчүгэй өйдөбүллээх барыахтаахтарын туһугар биир сомоҕо буолан турунуохтаахпытын дирекция салайааччыта санатар.

Биллэрин курдук, ханнык баҕарар үчүгэй тэрээһини ыытар буоллахха, харчы боппуруоһа сүрүн оруоллаах. Онон сибээстээн анал фонда тэриллибит. Оонньуулары ыытарга үбүнэн-харчынан көмөлөһүөххэйиҥ диэн улууспут аҕа баһылыга Бурцев А.С. ыҥырыы таһааран турар. Үлэлээн иитиллээччилэр сылга түөртэ биирдии күннээҕи хамнастарын бу фондаҕа угаллар. 2024 сылга түөрт квартал, 2025 сылга икки квартал. Бүгүҥҥү күнүнэн 8 мөлүйүөн 127 тыһ. 693 солк. 31 харчы киирдэ. Ол харчынан оонньууларбыт ымыыларын, оонньуулар буолаллара бачча күн хаалла диир кэннинэн ааҕар чаһыы, хас биирдии объектарга таһырдьа туалеттар, душтар оҥоһуллаллар. 35 эбийиэккэ итинник оҥоһуллар. Ипподром тутуллар. Өрөспүүбүлүкэ ипподрому оҥорууга 16 мөл. тыыран турар. Онон үп харчы итинник бара турар.

Салгыы П.Е. Захаров: “Хара Алдан оскуолата (дириэктэр О.И. Самсонова) туох да харгыһа суох фондаҕа харчытын баҕа өттүнэн уга олорор. Биир дойдулаахтарыгар үтүө холобуру көрдөрөр. С.В. Кононова салайааччылаах Тааттабыт балыыһатын бары үлэһиттэрэ эмиэ бу ыҥырыыны ылынаннар харчыларын фондаҕа уга олороллор. 1 мөлүйүөн 800 солк. сууманы укпуттара. Аны “Таатта” лесхоз тэрилтэни этиэхпин баҕарабын. Кини аата Таатта эрээри, государственнай бюджетнэй тэрилтэ иһигэр киирэр. Уранаев П.А. диэн салайааччылаах дьоҕус тэрилтэ сүрдээх үчүгэйдик оонньуулар тустарыгар кыһаллар. Улууспут тэрилтэлэриттэн Бурмистров И.И. тэрилтэтин өссө ааттыахпын баҕарабын. Сүрдээх элбэх үлэтин быыһыгар оонньуулар тустарыгар утары кэлэр. 500 куб. буору аппабытыгар-дьаппабытыгар кутан, сирбитин тэҥнээн биэрдэ. Ити курдук бары туруннахпытына, оонньууларбытын ситиһиилээхтик ыытыахпыт. Оонньуу кэнниттэн кэлиэҕэ биһиги кыайыыларбыт, туруорсууларбыт туолуохтара”, – диэн, Дэбдиргэҕэ буолбут көрсүһүүгэ иһитиннэрдэ.

Бэлэмнээтэ Гизелла ПОПОВА.

Таатта.