Александр Крылов турнира хайдах аастай?

«Өрөгөй» спорт уораҕайыгар билэрбит курдук, ааспыт өрөбүллэргэ Александр Крылов кэриэһигэр Бүтүн Арассыыйатааҕы турнир үһүс төгүлүн ыытылынна. Күрэхтэһиигэ 18 хамаандаттан барыта 155 бөҕөс күөн көрүстэ.

Бу иннинэ буолан ааспыт Д.П. Коркин турнирын кэнниттэн, икки нэдиэлэ устата бүрээттэр, тувиннар уо.д.а. уолаттар хааланнар саха тустууктарын кытта дьарыктаммыттара бэлиэтэнэр. Уопсай түмүккэ, 13 саха бириистээх миэстэҕэ тигистэ, онтон үһэ – кыһыл көмүс мэтээл. Сүрүн бирииһи, 1 млн солкуобайы – Айсен Потапов ылла.

Сылтан сыл ахсын, Сахабыт сиригэр маннык Арассыыйа, атын омук дойду таһымнаах көҥүл тустууга күрэхтэр ыытыллаллара олус бэрт көстүү. Эдэр саҥа тахсан, бэйэлэрин көрдөрөн эрэр уолаттарбыт дойдуларыгар, дьиэлэригэр тусталларын көрөн, саха дьоно сыаналыыр, анааран көрөр.

Биир бэйэм, Юлиан Григорьев тустуутун бэлиэтии көрдүм, тэтимин ыһыктыбакка, санаатын түһэрбэккэ, олох бүтэһик сөкүүндэҕэ диэри тустуон тустар эбит. Эчи сылбырхай киириилэрэ элбэҕэ, бырахсара да баһаам. Онтон Константин Капрынов финалга Александр Балтуевы дьэ, кырдьык, туох да мөккүөрэ суох бэйэтэ үлэлээн, бырахсан, атахтаан, приёмнары оҥорон кыайыан кыайда.

Атын да бөҕөстөр кыайыыга дьулуурдаахтарын, инникигэ эрэллээхтэрин көрдөрдүлэр. Ону тэҥэ, трибунаҕа олорор көрөөччүлэр ыһыыларынан-хаһыыларынан уолаттарбытыгар сэниэлэригэр сэниэ, күүстэригэр күүс эппиттэрэ буолуо диэн эрэнэбин. Тренерскэй састаап эмиэ хайдахтаах курдук бэйэлэрин иитиллээччилэригэр олуһун диэн долгуйалларын, ыалдьалларын бэлиэтиибин.

Биллэн туран, бу күрэхтэһиигэ атын бөҕөстөр хаалан кыттыыны ылбыттара күрэх уопсай хаамыытыгар өссө күүстээх интэриэһи үөскэттэ. Ол иһигэр, Красноярскай куораттан сылдьар убайдыы быраат – Никита, Антон Сучковтар, Дмитрий Зайнидинов, Бурятияттан – Жаргал, Баир Баяндуевтар, Виктор Жербаев, Александр Балтуев, Тываттан – Сайын Казырык, ону тэҥэ, Кежик Монгуш, Кежик Чымба курдук, үрдүкү кылаастаах тустууктар түһүлгэни чахчы киэргэттилэр.

Онон салгыы уолаттарбытыгар инники күрэхтэригэр өссө да үрдүктэн үрдүк ситиһиилэри, чыпчааллары дабайа туралларыгар баҕара хаалыаххайыҥ.

Милена АНДРЕЕВА.

“Триумф” пресс-киинин хаартыската.