Улуу тириэнэр Дмитрий Петрович Коркин турнирыттан санаалар

Дьэ, сылын ахсын ыытыллар, саха норуота бары кэриэтэ оллоонноон олорон күүтэр, кэтэһэр күрэҕэ быйыл уон бэһис төгүлүн ыытылынна. Аан дойду 13 араас муннугуттан ааттаах-суоллаах, биллэр-көстөр бөҕөстөр кэлэн кыттыыны ылан, сылбырхай, сытыы, тыҥааһыннаах, сүрдээх кыраһыабай киирсиилэри көрдөрөн барыбытын үөртүлэр.

Бэлиэтээн этэр эбит буоллаххына, бу, ааһан эрэр сылга, чахчы, спорт эйгэтигэр биир саамай үрдүкү, улахан таһымнаах тэрээһин, спорт бырааһынньыга буолан ааста диэтэхпинэ, арааһа, сыыспаппын. Тус бэйэм быйыл пресса, спортивнай суруналыыс быһыытынан үлэлээтим-хамсаатым, онно бэлиэтии көрөрбүнэн, уопсай тэрээһин, күрэхтэһии ыытыллыыта сылтан сыл ахсын тубустар тупсан, өссө сайдан иһэрэ олус кэрэхсэбиллээх.

Билэрбит курдук, саха тустууктарыттан бары ыйааһыҥҥа 90-тан тахса кэриэтэ бөҕөс туһунна. Кинилэртэн 57 киилэ ыйааһыҥҥа аан маҥнайгытын кыттан, эрэнэр бөҕөспүт Лев ПАВЛОВ бочуоттаах бастакы миэстэни ылары ситистэ, 61 кг Александр АВЕЛОВ эмиэ кыһыл көмүс мэтээли бэйэтин суотугар сурунна, өссө ити ыйааһыҥҥа Оренбург уобалаһыттан киирсэр бөҕөспүт Яков ПАВЛОВ боруонса мэтээл хаһаайынынан буолла. Салгыы 70 кг Константин КАПРЫНОВ иккис миэстэни ылла. Онтон 74 кг биһиги киэҥ туттар бөҕөспүт, Парижка ыытыллыбыт Олимпиада кыттыылааҕа, тас дойдуттан тустар – Виктор РАССАДИН кыайыан кыайда уонна Коркин турнирын 7 төгүллээх чөмпүйүөнүн аатын сүктэ. 86 кг тустар Андриан ЛЕНСКЭЙ бастакынан боруонса мэтээли аҕалбыта. 92 кг иккис төгүлүн субуруччу үһүс миэстэни ылла – Ньургун СЕРГИН. 97 кг Красноярскай кыраай аатыттан тустар – Максим ТОЛМАЧЁВ эмиэ боруонса мэтээлинэн наҕараадаланна. Уонна саамай улахан ыйааһыҥҥа 125 кг Никита ХАБАРОВ боруонса мэтээли үөрдэ-көтүтэ аҕалла.

Былырыыҥҥы көрдөрүүнү кытта тэҥнээтэххинэ, быйыл уолаттарга, кинилэр тириэнэрдэригэр улахан сыралаах, өссө күүстээх үлэ барбытын, ыытыллыбытын уопсай түмүккэ көрдүбүт-иһиттибит, сыаналаатыбыт.

Быйыл элбэх киһи бэлиэтии көрбүтүнэн, Иран дойдута бэйэтин юниорскай, эдэр састаабын аҕалан кытыннарда, Бурятия эмиэ олох үчүгэй састаабын аҕалбыт, ол иһигэр, Коркин турнирын 6 төгүллээх кыайыылааҕа – Евгений Жербаев, Виктор Жербаев, Тамир Ешинимаев, убайдыы быраат Баир, Жаргал Баяндуевтар курдук, уо.д.а бөҕөстөр түһүлгэни киэргэттилэр. Ону тэҥэ, монголлар, тувиннар бэрт үрдүкү таһымҥа сылдьалларын көрдөрдүлэр.

Онтон саамай чаҕылхай, таһаарыылаах түмүгү КОРКИН турнирыгар биллэн турар, Дагестан өрөспүүбүлүкэтэ көрдөрдө. Биэс кыһыл көмүс мэтээли бэйэлэрин суоттарыгар суруннулар – аан дойду чөмпүйүөнэ, үтүөлээх спорт маастара – Абасгаджи Магомедов (65 кг), Ахмед Усманов (79 кг), эдэр, кэскиллээх бөҕөс Мухамед-Тахир Ханиев (92 кг), Магомед Курбанов (97 кг), Шамиль Мусаев (125 кг).

Д.П. Коркин турнирын бастыҥ тустуугунан талыллан “Үрүҥ көмүс борцовка” хаһаайынынан талыллыбыта – Абасгаджи Магомедов (Дагестан), утарсааччыларыгар биир да очкуону биэрбэккэ, кылаастаах бөҕөс буоларын өссө төгүл бигэргэттэ.

Түмүктээн, даҕатан эттэххэ, улуу тириэнэрбит Дмитрий Петрович Коркин көҥүл тустууга турнира бэрт чаҕылхайдык, уратытык, умнуллубаттык, сытыытык-хотуутук буолан ааста. Сылын ахсын тас, атын дойду спортсменнара хото кэлэн күрэхтэһиини киэргэтэн бараллара, киһини үөрдэр уонна биһирэтэр.

Милена АНДРЕЕВА.