Тустуу – тустууктарга эрэ буолбатах!

Хаһан баҕарар саха киһитигэр улахан таһымнаах күрэхтэһии, тэрээһин – бу бырааһынньык, өрө көтөҕүллүү. Маннык түгэҥҥэ сөп түбэһиннэрэн, соһуччу кэриэтэ, үөрбүччэ-көппүччэ, тустууну таптааччыларга билгэлээһин конкурсун тэрийиэххэ диэн санаа киирэн кэлбитэ.

Онуоха бастатан туран, сүрүн кыһалҕата – бирииһэ этэ. Ону «Өрөгөй» Спорка бэлэмнэнии киинин дириэктэрэ Михаил Дмитриевич Пахомовка эппиппэр, кини тута сөбүлэһэн, спорду сэҥээрээччилэр икки ардыларыгар конкурс тэрилиннэ. Буолан баран, кини, бу түһүлгэҕэ анаан оҥоһуллубут өйдөбүнньүк мэтээли бириис быһыытынан биэрэрин эттэ. Михаил Дмитриевичкэ улахан махтал!

Онон бэрт кылгас болдьох иһигэр биллэриллибит конкурска барыта 40 киһи бэйэтин хоруйун ыытта. Син эмиэ күрэхтэһии састаабыгар курдук, конкурска – тустууну өрүү кэтээн көрөр, спорт бу көрүҥүн үчүгэйдик билэр, бу иннинэ «Дьулурҕан» конкурстарыгар элбэхтэ кыайыылаахтарынан тахсыбыт дьон кыттан, бэйэлэрин сылыктааһыннарынан күрэхтэһэллэр.

Онон конкурс кыайыылааҕа – эмиэ, улуу тренер Д.П. Коркин турнирын кыайыылааҕынан ааттаныа.

Билэргит курдук, конкурс икки ыйытыылаах этэ. Бастакыта, ыйааһыннарынан кыайыылаахтары ааттааһын. Манна дьон үксэ Лев Павлов, Абасгаджи Магомедов, Виктор Рассадин, Евгений Жербаев, Ахмед Усманов, Шамиль Мусаев диэбиттэр. Оттон икки ыйытыы – турнир бастыҥ бөһөһүнэн ким ааттанан «Үрүҥ көмүс борцовканан наҕараадаланыай?» диэн этэ. Манна эмиэ Лев Павлов, Абасгаджи Магомедов, Виктор Рассадин ааттара элбэхтэ ахтыллыбыт.

Манна даҕатан эттэххэ, күрэхтэһиини тэрийээччилэр быһаарыыларынан, «Үрүҥ көмүс борцовка» бириис үһүс сылын туттарыллар. Инники сылларга итинник бирииһинэн Заурбек Сидаков уонна Виктор Рассадин наҕараадаламмыттара. Бу сырыыга дьэ кимиэхэ ананар?

Конкурс кыайыылааҕа, ааҕан-суоттаан баран, сарсын сайтка биллэриллиэҕэ. Кэтээн көрө сылдьаргытыгар ыҥырабыт.

Петр ПАВЛОВ.