«Триумф» киинэни көрөн баран…

Улуу тренер Дмитрий Петрович Коркин кэриэһигэр көҥүл тустууга норуоттар икки ардыларынааҕы турнир чэрчитинэн алтынньы 17 күнүттэн өрөспүүбүлүкэ киинэ театрдарыгар «Триумф» диэн саҥа киинэ көрдөрүллүүтэ саҕаланыа.

Ол иннинэ «Лена» киинэ театрыгар бу үлэни суруналыыстарга анаан сүрэхтээһин буолла. Киинэҕэ – ССРС, РСФСР, Саха АССР үтүөлээх тренерэ Дмитрий Петрович Коркин уонна кини иитиллээччилэрэ Роман Дмитриев, Павел Пинигин, Александр Иванов Монреаллааҕы-76 Олимпиадаҕа өрөгөйдөрүн туһунан көрдөрүллэр.

Биир бэйэм, киинэни көрөн баран астынным. Киинэ табыллыбыт, бэртээхэй! Киинэни оҥорбут, өйөөбүт дьоҥҥо, бары артыыстарга барҕа махтал!

Бастатан туран, билиһиннэрэр бастакы көрдөрүүгэ сааланы толору эдэр ыччат кэлбитэ наһаа үчүгэй. Ол аата, эдэр көлүөнэ урукку кэм туһунан айымньыны сэҥээрэрин, спорду биһириирин, Дмитрий Петрович Коркиҥҥа уонна олимпиецтарга сүгүрүйэрин көрдөрөр дии саныыбын. Бары билэрбит курдук, кэнники кэмҥэ “саха киинэтэ” диэн өйдөбүл киэҥник тэнийдэ, биһирэбили ылла. Бииртэн биир үчүгэй, көрөөччүнү кэрэхсэтэр уус уран киинэлэр оҥоһуллан тахсан иһэллэрэ киһини үөрдэр. Ол да быһыытынан, киинэни сөбүлээн көрөр эдэр дьон хото кэллэхтэрэ.

Икки чаас курдук улахан экраҥҥа көрдөрүллүбүт киинэ түгэннэрэ биһиги улуу тренербит, олимпиецтарбыт тустарынан – эрдэтээҥҥи суруйууларга, кинигэлэргэ хайдах баарын курдук, барыта кэм-кэрдии быһыытынан арыллан истэ. Павел Пинигин ийэтин алгыһа уонна быстыыта, номох буолбут Сахаачча ууга былдьаныыта ханнык баҕарар көрөөччүнү долгутар гына оҥоһуллубут. Аны олимпиецтарбыт Роман Дмитриев, Александр Иванов, Павел Пинигин Монреаль көбүөрүгэр тустууларын, оччотооҕу, көбүөргэ уонна көбүөр таһынааҕы тыҥааһыны көрөөччүгэ итэҕэтиилээхтик тиэрдэр.

Артыыстар бары бэйэлэрин оруолларын ылыннарыылаахтык толордулар дии санаатым. Санатан эттэххэ, Дмитрий Петрович Коркин оруолун Саха Республикатын үтүөлээх артыыһа Иннокентий Луковцев, Роман Дмитриеви – Семен Лукин, Павел Пинигини – Гаврил Менкяров, Александр Иванову – Дьулусхан Андросов, Сахааччаны – Александр Кузьмин ылыннарыылаахтык оонньоотулар.

Манна даҕатан эттэххэ, “Коркинныы олоруохха. Коркинныы айыахха” диэн, Д.П. Коркин нэһилиэстибэтигэр анаммыт республикатааҕы быыстапка ыытыллара үгэскэ кубулуйда. Быыстапкаҕа биһиги биллэр дьоммут спорка ситиһиилэрин көрдөрөр элбэх ахсааннаах хаартыскаларын, мэтээллэрин таһынан, кинилэр тутта сылдьыбыт маллара, кэтэ сылдьыбыт таҥастара сырыы ахсын туруоруллан киэҥ эйгэҕэ көрдөрүллэр. Холобур, номох буолбут бөҕөс Николай Захаров – Сахаачча кэтэ сылдыбыт футболкатын, кини оруолун толорооччу киинэҕэ кэтэн оонньообутун киһи кэрэхсии көрөр. Бэйэтин кэмигэр сөп түбэһиннэриллибит ылыннарыылаах көстүү.

Киинэҕэ, кэлин биллиилээх суруйааччы буолбут Семен Андреевич Попов – Сэмэн Тумат тустуунан дьарыктанан иһэн тоҕо бырахпыта ойууламмыта сэргэхтик көстөр. Дьэ, тоҕотун болҕойон көрөөрүҥ эрэ.

Режиссер Михаил Лукачевскай бу үлэтэ бэрт кылгас кэмҥэ оҥоһуллан тахсыбытын, киинэ хайдах буолбутун көрөөччүлэр эрэ сыаналыылларын туһунан этиитэ – эдэр киһи бэйэтин үлэтигэр дууһатынан ыалдьарын, ирдэбиллээхтик сыһыаннаһарын уонна сиэрдээҕин көрдөрөр. Итиэннэ киинэ оҥорооччу быһыытынан өссө сайдан, биллэн иһэригэр төрүөттэри үөскэтэр.

Киинэҕэ биир маннык түгэн баар: Монреаллааҕы Олимпиадаҕа көҥүл тустууга ССРС сүүмэрдэммит хамаандатын састаабыгар кимнээх киирбиттэрин билиһиннэрии. Онно биһиги бөҕөстөрбүтүттэн ураты атыттар ааттарын уларытан киллэрбиттэр. Киинэни ырытыһыыга суруналыыстар тоҕо итинннигий диэн ыйыппыттарыгар киинэ режиссера, уус уран киинэ бэйэтэ уратылаах, “Триумф” – документальнай киинэ буолбатах, онон эбиилээх-сабыылаах, тупсарыылаах туспа айымньы буолар диэн хоруйдаабытыгар мин сөбүлэһэбин.

Онон түмүктээн эттэххэ, спорка сыһыаннаах үчүгэй киинэ оҥоһуллубут. Хайаан даҕаны быыс булан көрөргүтүгэр, бэйэҕит сыаналыыргытыгар ыҥырабын. Ордук чуолаан, спортсмен оҕолор, студеннар көрөллөрүгэр баҕарабын. Тоҕо диэтэргит, “Триумф” киинэ – биһиги историябыт, биһиги чулуу дьоммутугар сүгүрүйүү, кэриэстээһин, кинилэр ааттарын үйэтитии! Ол эбэтэр, киинэ сүрүн туһаайыыта иитэр-өйдөтөр суолтатыгар сытар.

Киинэ сүрэхтэниитигэр ыҥыран сырытыннарбыт, көрдөрбүт дьоҥҥо – тэрийээччилэргэ барҕа махтал!

Петр ПАВЛОВ.