Сонуннар

Тирана-2024: Түһүлгэ дьолуота антах хайыста

Албания киин куоратыгар Тиранаҕа, Олимпиадаҕа киллэриллибэтэх ыйааһыннарга көҥүл тустууга аан дойду чемпионата ыытылла турар. Манна, Парижтааҕы оонньууларга кыттыбыттар – тустубаттар. Ол да буоллар, састаап добуоччу күүстээх.

Көбүөр сулустара Заур Угуев, Джордан Барроуз, Дэвид Тейлор, Абдулрашид Садулаев, Виталий Оруджев, Камран Гасемпур билиҥҥи тустуулара киһини барытын сэҥээрдэр.

Бу чемпионакка биһиги уолаттарбыт табыллыбатылар. Арыйаан Тютрин 61 киилэҕэ монгол Цевенсурен Цохтбадрахха 1:2 ахсаанынан хотторон кэбистэ. Тустуу олох тэбис тэҥҥэ барда. Ону судьуйалар күөдьүтэн, сытыырхатан биэрээри, бастаан биһиги уолбутугар, онтон монголга сэрэтии биэрдилэр. Онон иккис түһүмэх ортотугар диэри ахсаан 1:1, Тютрин туһатыгар буолан турдаҕына, төһө эмэ киирсэ сылдьар киһиэхэ өссө сэрэтии биэрэн – хотторуулаах таҕыстыбыт.

Бөҕөстөр тэҥнэрэ бэрт буолан, хайалара да албастаһан баал ылбата. Биир түгэҥҥэ Арыйаан киһитин көбүөр таһыгар тустууга тоҕоостоох кыл түгэнэ көстүбүтүн мүччү тутан кэбистэ. Итини, түһүлгэ дьолуота биэрбэтэ, антах хайыста диэххэ сөп. Дьэ, кыһыылаах.

Салгыы күрэхтэһиигэ Цохтбадрах – кыргыз Жумашбегы уонна иранец Моменины кыайталаан баран, финалга тахсыыга турок Думаҥҥа хотторон кэбистэ. Онон монгол бүгүн боруонса мэтээл иһин тустуоҕа.

Оттон бу түһүлгэҕэ иккис киһибит – Ньургун Скрябин, Иран тахсан эрэр кэскиллээх бөҕөһүгэр Сина Халилига сатаан утарсыбата. Очукуонан ыраастык хоттордо. Бу, 18 саастаах аан дойду уонна Азия күрэхтэһиилэрин кыайыылааҕа салгыы күрэхтэһиигэ кыргыз Осмонову 10:0 кыайан баран, финал чиэппэригэр таджик Кудиевка 5:6 ахсаанынан кыл мүччү хотторон кэбистэ. Онон биһиги тустан бүттүбүт.

PS: Уолаттарбыт тустууларын уонна россияннар сытыы хапсыһыыларын видеотын “Дьулурҕан” телеграмҥа каналыгар t.me/dzulurgan көрүөххүтүн сөп.

Россия хамаандатыттан Магомед Магомаев 79 кг, Абдулрашид Садулаев 92 кг – быһаарыылаах хапсыһыыларга таҕыстылар. Онон кинилэр кыһыл көмүс мэтээл иһин тустуохтара. Оттон Заур Угуев (61 кг) «уоскутар» бөлөххө киирсиэҕэ. Иналбек Шериев (70 кг) үһүс бириистээх миэстэ иһин тустуоҕа. Онон россияннар бары мэтээл иһин киирсэр кыахтаахтар.

Финалларга көрсүөхтэрэ:

61 кг Ахмет Думан (Турция) – Масаносукэ Оно (Япония)

70 кг Йошиносукэ Аояги (Япония) – Нуркожа Кайпанов (Казахстан)

79 кг Автандил Кенчадзе (Грузия) – Магомед Магомаев (Россия)

92 кг Абдулрашид Садулаев (Россия) – Мириани Майсурадзе (Грузия).

Бүгүн түүн Дьокуускай бириэмэтинэн 24:00 чаастан «уоскутар» бөлөх тустуулара саҕаланар. Оттон финаллар 02:00 чаастан буолуохтара.

«Дьулурҕан».

Добавить комментарий

Ваш адрес email не будет опубликован. Обязательные поля помечены *

289249
Бүгүн : 205