Тирана-2024: Ситиһиилээх кыттыыны баҕарабыт

Албания киин куоратыгар алтынньы 30 күнүгэр, Олимпиадаҕа киллэриллибэтэх ыйааһыннарга (61, 70, 79, 92 кг) көҥүл тустууга аан дойду чемпионата саҕаланар. Бу чемпионакка саха тустууга кыһатын икки иитиллээччитэ кыттар.

70 киилэҕэ барыта 25 бөҕөс күөн көрсүө. Манна армянин Андреасяны уонна болгарин Рамазановы рейтининэн көрөн, бас-көс дьон диэн, бөлөххө араарбыттар. Биһиги Ньургун Скрябиммыт сэрэбиэйинэн аллараа, Рамазанов бөлөҕөр киирбит.

Уолбут бастакы эргииргэ утарсааччыта – эдэр иранец Сина Махди Халили. Халили сааһа 18-һа. Былырыын 65 киилэҕэ уолаттарга Азия уонна аан дойду күрэхтэһиилэригэр бастаабыта. Быйыл Тахти кубогар 70 кг кыайбыта. Дьиҥэ, эрдэтээҥҥи сайаапка быһыытынан Ирантан бу ыйааһыҥҥа аан дойду икки төгүллээх призера, Азия чемпиона Амир Яздани кэлиэхтээх этэ даҕаны, эчэйиилээх буолан кинини солбуйдулар.

Манна хайалара кыайбыт салгыы эргииргэ (финал 8/1-гэр) кыргыз Осмоновы кытта киирсиэҕэ. Ол кэмҥэ монгол Энхтуя, таджик Кудиев, болгарин Рамазанов бэйэлэрин икки ардыларыгар ким күүстээҕин быһаарсыахтара. Үһүөн тэҥ кэриэтэ кылаастаах тустууктар. Кудиев соторутааҕыта Хотугу Осетияҕа бырааттыы Хадарцевтар турнирдарыгар кыахтаахтык бастаабыта. Бу сырыыга дьэ хайдах тустар? Кинини өрүү биир тэҥ ситиһиилээхтик тустар бөҕөс диэн киһи эппэт.

Өссө бу бөлөххө американец Грин, казах Кайпанов курдук биллэр-көстөр бөҕөстөр бааллар.

Оттон үөһэ бөлөххө россиянин Иналбек Шериевы, армянин Андреасяны уонна дьоппуон Оаягины чорботуохха сөп. Оаяги аҕыйах хонуктааҕыта манна, Тиранаҕа 23-гэр диэри саастаахтарга аан дойду түһүлгэтигэр үһүс миэстэлэммитэ.

Онон, ырытан көрдөххө, бу ыйааһыҥҥа кыттааччылар бары кэриэтэ тэҥ сыһа тустар таһымнаахтар, киһи кими даҕаны ойуччу туппат. Ким баҕарар бастаан кэбиһиэн сөп.

34 саастаах Ньургун Скрябин улахан таһымна бу бүтэһик кэриэтэ кыттыыта буолуохтаах. Киниэхэ, эдэр сэнэх саастарын тустууга анаабыт киһиэхэ ситиһиилээх кыттыыны баҕарабыт. Ылан көрдөххө, Ньургун мэтээлгэ тиксэр кыахтаах. Барыта бүгүҥҥү күҥҥэ хайдах бэлэмнээҕиттэн тутулуктаах.

Петр ПАВЛОВ.