Семен Петуховка үтүөлээх тириэнэр аата иҥэрилиннэ

Уһулуччулаах тириэнэр Дмитрий Петрович Коркин аатынан күрэхтэһии кэмигэр үөрүүлээх түгэн буолла. Ол курдук, буолан ааспыт турнирга Уус Алдан улууһун оҕо спортивнай оскуолатын Суоттутааҕы филиалын тириэнэрэ, көҥүл тустууга ССРС успуордун маастара Семен Гаврильевич Петуховка – “Саха Өрөспүүбүлүкэтин үтүөлээх тириэнэрин” үрдүк аата иҥэрилиннэ.

Наҕарааданы Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Местников туттарда.

Семен Петухов Чурапчытааҕы успуорка интернат-оскуолатын иитиллээччитэ. Онно улуу тириэнэр Д.П. Коркин салалтатынан тустуунан дьарыктаммыта. Салгыы Саха АССР үтүөлээх тириэнэрэ Н.Н. Константиновка эрчиллибитэ. Көҥүл тустууга Сэбиэскэй Сойуус успуордун маастарын нуорматын 1980 – олимпийскай сыллаахха Бүтүн Сойуустааҕы турнирга 52 киилэҕэ бастакы миэстэни ылан, толорбута.

Тустуук Семен Петухов ситиһиилэрэ: РСФСР Кубогар иккис миэстэлээх, Саха сирин икки төгүллээх чөмпүйүөнэ, Дальнай Восток уонна Сибиир зонатын 4 төгүллээх чөмпүйүөнэ. Хапсаҕайга Манчаары спартакиадатын иккис призера…

С.Г. Петухов – М.К. Аммосов аатынан Саха государственнай университетын ситиһиилээхтик үөрэнэн бүтэрбитэ. Саха Өрөспүүбүлүкэтин үөрэҕириитин туйгуна, Уус Алдан улууһун, Суотту нэһилиэгин бочуоттаах гражданиннара.

Бастыҥ иитиллээччилэрэ: Дмитрий Алексеев, Семен Семенов, Дмитрий Петухов, Арыйаан Тютрин, Савва Андросов, Евгений Новиков, Валерий Андросов, Илья Бочкарев, Иван Степанов, Данил Мохначевскай уо.д.а.

Семен Гаврильевичка Саха Өрөспүүбүлүкэтин үтүөлээх тириэнэрэ үрдүк аат, кини тириэнэрэ Дмитрий Петрович аатынан түһүлгэҕэ үөрүүлээхтик туттарыллыбыта икки бүк үөрүүлээх бэлиэ түгэн диэххэ сөп. Кини учууталын, эрчийээччитин алгыһын ылынан, кини суолун тэлэн, саха тустуута сайдыытыгар бэйэтэ тириэнэр быһыытынан кылаата сыаналаммыта кэрэхсэбиллээх.

Семен Гаврильевиһы эҕэрдэлээн туран, өссө даҕаны, айымньылаах үлэтигэр ситиһиилэри баҕарыаҕыҥ.

Петр ПАВЛОВ.

Ааптар хаартыскаҕа түһэриитэ.