Саахымат 45-с олимпиадата

Балаҕан ыйыгар Венгрия киин куоратыгар Будапешка саахымат аан дойдутааҕы 45-с олимпиадата ыытыллан түмүктэммитэ. Эр дьоҥҥо 189, дьахталларга 169 хамаанда кыттыбыта. Барыта 11 тур оонньоммута.

Эр дьон. Доммараджу Гукеш, Рамешбабу Прагнанандха, Арджун Эригайси, Сантош Видит састааптаах Индия эдэр хамаандата эрэллээхтик бастаабыта. АХШ, Узбекистан, Кытай, Сербия уонна Армения тэҥ очукуолаахтара. Кооэфициент быһаарыытынан АХШ иккис, Узбекистан үһүс буолбуттара. Икки сыллааҕыта Индияҕа ыытыллыбытыгар Узбекистан соһуччу бастаан турардаах.

Дьахталлар. Дронавалли Харика, Рамешбабу Вайшали, Дивья Демшукх, Вантика Агравал оонньооччулардаах Индия эмиэ инники тахсыбыта. Иккискэ Казахстан, үһүскэ эмиэ кооэфициент быһаарыытынан АХШ тахсары ситиспитэ. Дьиҥэр АХШ, Испания, Армения, Грузия ылбыт очукуолара тэҥ этэ. Казахстан оонньооччута Бибисара Асаубаева таһыччы үчүгэйдик оонньообутун бэлиэтээбиттэрэ. Тутатына Казахстан Президенэ Касым-Жомарт Токаев барыларыгар эҕэрдэтин тиэрдибитэ, ситиһиилэри баҕарбыта. 2022 сыллаахха Ченнаи куоракка Украина бастаан турар. Таһыччы күүстээх Кытай олох атын састаабынан кыттан, сэмэй көрдөрүүлэммитэ.

Уопсай көрүүгэ Азия судаарыстыбалара инники күөҥҥэ таҕыстылар. Эдэрдэрин учуоттаатахха, Индия өтөр наар иннин биэриэ суох курдук. Аныгыскы олимпиада 2026 сылга Узбекистаҥҥа ыытыллыахтаах.

18 саастаах Доммараджу Гукеш уонна Кытайтан билиҥҥи чөмпүйүөн Дин Лижэнь аан дойдуга бастыыр иһин матчтара бу дьыл сэтинньи 20 күнүттэн Гонкоҥҥа ыытылларын, саахыматы сэҥээрээччилэр, успуорду таптааччылар ээр-сэмээр күүтэллэр. Манна Гукеш фаворит быһыытынан сыаналанар.

Степан Андреев.

Майа.