Сөҕөбүт уонна киэн туттабыт!
Саха Өрөспүүбүлүкэтин Уопсастыбаннай палаататын мунньахтыыр саалатыгар XIII сайыҥҥы Паралимпийскай оонньуу харбааһыҥҥа үрүҥ көмүс призера, аан дойду уонна Европа хас да төгүллээх чөмпүйүөнэ, спорт үтүөлээх маастара Анастасия Диодорованы, улахан спортан үөрүүлээхтик атаарыы тэрээһинэ ыытылынна.
Билэргит курдук, Анастасия – биһиги биллиилээх тустуукпут, норуоттар икки ардыларынааҕы кылаастаах спорт маастара Алексей Диодоров төрөппүт кыыһа. Кыыс спорка сыстыыта, спорду таптааһына барыта аҕатыттан саҕаламмыт буолуохтаах диэн бүк сэрэйэбит. Ол курдук, бэйэтин иннигэр сыал-сорук туруорунан, туох баар ыарахаттары барытын эрдээхтик туораан – тулуурдааҕын, дьаныардааҕын, кыайыыга дьулуурдааҕын көрдөрдө диэн үрдүктүк сыаналыыбыт.
Сүүрбэччэ сыл устата улахан спорт эйгэтигэр сылдьан, элбэх ситиһиилэннэ. Итинэн Анастасия Диодорова – ыччаттарга, олохторугар ыарахаттары көрсүбүт дьоҥҥо үтүө холобур уонна киэн туттуу чаҕылхай быһыытын көрдөрөр диэххэ сөп.
Бу кэм устата Анастасия Диодорова төрөөбүт Сахатын сирин олохтоохторун эрэ буолбакка, бүтүн аан дойду спорду сэҥээрээччилэрин бэйэтин ситиһиилэринэн сөхтөрдө, ытыктатта. Кини улахан таһымнаах күрэхтэһиилэртэн ылбыт элбэх ахсааннаах мэтээллэрэ быһа холоон 14 киилэ буолбуттара ханнык баҕарар киһини сөхтөрөр. Бу элбэх үлэттэн, дьаныардаах дьарыктан, үгүс көлөһүнтэн ситиһиллибит наҕараадалар…
Петр ПАВЛОВ.
Ааптар хаартыскаҕа түһэриилэрэ.