Сүрүн бириис – биир мөлүйүөн

Бу өрөбүл күннэргэ «Өрөгөй» Спорка бэлэмнэнии киинигэр эмиэ – тустуу. Бу сырыыга РФ спордун маастара, Ил Түмэн депутатынан талыллан үлэлии сылдьыбыт, саха тустуутугар улахан өҥөлөөх Александр Крылов кэриэһигэр көҥүл тустууга Бүтүн Россиятааҕы үһүс турнир.  

Саха сирин хамаандатыттан сайаапка быһыытынан 90-ча бөҕөс кыттыаҕа. Үөрүйэхтээх бөҕөстөрү тэҥэ эдэрдэр бэйэлэрин күүстэрин холонон көрүөхтэрэ. Кыттааччылар ортолоругар соторутааҕыта улуу тренер Д.П. Коркин турнирыгар ситиһиилээхтик тустубут Александр Авелов, Константин Капрынов, Андриан Ленскэй, Ньургун Сергин, Максим Толмачев, Никита Хабаров бааллар.

Күрэхтэһиигэ олохтоохтору тэҥэ Бурятия, Тыва, Владивосток, Иркутскай, Кемерово, Красноярскай, Новосибирскай, Хабаровскай уонна Монголия спортсменнара күөн көрсүөхтэрэ.

Ыйааһын ахсын кыайыылаахтар – 70, иккис буолбуттар – 50, үһүстээбиттэр – 30 тыһ. солк. харчынан наҕараадаланыахтара. Кыайыылааҕы бэлэмнээбит тренер 20 тыһ. солк. бэлиэтэниэҕэ. Күрэхтэһии бириискэ фондатын – 2 мөлүйүөнү А.В. Крылов дойдута – Өймөкөөн улууһун дьаһалтата туруорда. Турнир бэлиэ түгэнинэн – кыайыылаахтар икки ардыларыгар 1 мөл. солк. харчы оонньотуу буолар. Бу бирииһи Александр доҕотторо көмөлөөн туруорбуттарын бэлиэтиир тоҕоостоох.

Санатан эттэххэ, бу иннинээҕи түһүлгэлэргэ сүрүн бириис хаһаайыннарынан Дмитрий Зайнидинов (Красноярскай) – 2022 сыллаахха уонна Тумэн Бодиев (Бурятия) – 2023 сыллаахха буолбуттара. Бу сырыыга дьоллоох түгэн дьэ кимиэхэ тосхойор?

Дьэ онон, Александр Крылов үһүс турнира саҕаланара чугаһаата. Оттон биһиги, бу хаартыскаларынан сирдэтэн, инники икки күрэхтэһиини санаан ылыаххайыҥ.

Петр ПАВЛОВ.

Ааптар хаартыскаҕа түһэриилэрэ