Остуол тенниһэ өрүү сайда турдун

Алтынньы 10 күнүгэр Ньурба улууһун Хаҥалас нэһилиэгэр остуол тиэнниһин секциятын оҕолоругар күрэхтэһии ыытылынна.

Саҥа сезону саҕалыыр күрэхтэһии Василий Тимофеевич Иванов аатынан успуорт саалатыгар 13 оҕо кыттыылаах буолан ааста. Манна Н.И. Кочнев аатынан Хаҥалас нэһилиэгин орто сүһүөх кылаастарын уолаттара кыттыыны ыллылар. Күрэхтэһиини иилээн-саҕалаан энтузиаст, физкультура учуутала Алена Ивановна Федорова ыытта.

Оҕолору көҕүлээн теннисист дьиэ кэргэн – Алексеевтар харчынан бириис олохтоон кыттааччылары үөртүлэр. Ол курдук, бириистээх миэстэҕэ тиксибит, оскуолаҕа сынньалаҥ кэмигэр ракеткаларын илиилэриттэн араарбат алтыс кылаас уолаттара: Алексеев Олимпий бастакы миэстэ, иккис Васильев Уйгулаан, үһүс Федоров Леон буоллулар. Үөрэнээччилэр бары да төрөппүттэрин холобур оҥостон, кинилэри кытта тэҥнээхтик дьарыктаналлар.

Хаҥалас нэһилиэгэр теннис көрүҥэ баара балай да ыраатта, кыралыын-улаханныын бары ракетканы туппутунан сылдьаллар. 80-с сыллартан Василий Тимофеевич Иванов остуол тенниһигэр утумнаахтык дьарыктыыр этэ.  Хас да көлүөнэ теннисистэри иитэн таһаарбыта, мин эмиэ киниэхэ уһуйуллубутум.

Василий Тимофеевич үтүө аата үйэлэргэ умнуллубат. Билигин кини үлэтин салҕааччынан иитиллээччитэ Алена Ивановна Федорова буолар. Оҕолор сөбүлээн, баҕаран туран дьарыктаналлар. Ол курдук, бу дьыл бэс ыйыгар Алексеев Олимпий уонна Федорова Лияна Кытай сирин Харбин куоратыгар сборданан кэлбиттэрэ.

Буолан ааспыт күрэхтэһии саҥа кыайыыларга кынаттыа, ситиһиилэри аҕалыа диэн эрэнэбит! Остуол тенниһэ өрүү сайда турдун.

Анжелина ЖДАНОВА, М.К. Аммосов аатынан Хотугулуу Илиҥҥи федеральнай университет студентката.