Коркин турнирын историятыттан…

ССРС, РСФСР, Саха АССР үтүөлээх тренерэ, республика үтүөлээх учуутала Дмитрий Петрович Коркин аатынан тустууга күрэхтэһии 1985 сыллаахха аан бастаан Чурапчыга ыытыллыбыта. Ол күрэхтэһии республика аһаҕас чемпионатын быһыытынан барбыта. Красноярскайтан, Хабаровскайтан, Бурятияттан бөҕөстөр кэлбиттэрэ.

Үс күннээх күүрээннээх күрэхтэһии түмүгүнэн бэйэлэрин ыйааһыннарыгар бастаабыттара: 48 кг – Герман Христофоров (Уус Алдан), 52 кг – Егор Алексеев (СГУ), 57 кг – Роман Цыпандин (Дьокуускай), 62 кг – Роман Монгуш (Красноярскай), 68 кг – Борис Борисов (СГУ), 74 кг – Степан Еремеев (Сунтаар), 82 кг – Захар Чукров (Нам), 90 кг – Максим Васильев (Чурапчы), 100 кг – Валентин Иванов (Дьокуускай). Онон кинилэр улуу тренер аатынан күрэхтэһии бастакы кыайыылаахтарынан буолаллар.

1987 сылтан Д.П. Коркин аатынан көҥүл тустууга Бүтүн Сойуустааҕы турнир ыытыллыбыта. Күрэхтэһии Дьокуускайга, СГУ култуурунай киинигэр буолбута. 1988, 1990 сс. Бүтүн Сойуустааҕы турнирдар Чурапчыга тэриллибиттэрэ. Оттон 1989 сыллааҕы итинник турнир Дьокуускайга ыытыллыбыта.

Оттон, 1991-1992 сс. «Золотой пояс Якутии» диэн норуоттар икки ардыларынааҕы турнир Д.П. Коркин кэриэһигэр ананан ыытыллыбыта. «Спартак» стадиоҥҥа ыытыллыбыт бастакы түһүлгэ кыайыылаахтарынан буолбуттара: 48 кг – Лубсан Сэргэлэнбаатар (Монголия), 52 кг – Никита Никифоров, 57 кг – Михаил Корякин (иккиэн Саха сириттэн), 62 кг – Андрей Пестерев (Улан-Удэ), 68 кг – Рашид Абушев (Дагестан), 74 кг – Алексей Старостин (Саха сирэ), 82 кг – Руслан Хинчагов (Хотугу Осетия), 90 кг – Михаил Каминскас, 100 кг – Виктор Косарев (иккиэн Красноярскай), 130 кг – Алексей Ефремов (Белоруссия).

1998 сыллаахха алтынньы ыйга Д.П. Коркин 70 сылыгар анаммыт республикатааҕы күрэхтэһии Чурапчыга ыытыллыбыта.

1999 сылтан уһулуччулаах тренер, Октябрьскай революция уонна «Бочуот Знага» орденнар кавалердара Д.П. Коркин аатынан тустууга күрэхтэһии Бүтүн Сойуустааҕы турнир быһыытынан Нерюнгрига ыытыллыбыта. Сүрүн тэрийээччинэн «Якутуголь» тэрилтэ буолбута.

Оттон 2008 сылтан улуу тренер Д.П. Коркин аатынан күрэхтэһии Тустуу аан дойдутааҕы федерациятын (ФИЛА) календарыгар киллэриллэн, норуоттар икки ардыларынааҕы турнир аатын ылбыта. Маҥнайгы турнирга РФ регионнарын тэҥэ Азербайджан, АХШ, Беларусь, Казахстан, Монголия, Таджикистан, Турция дойдуларын тустууктара күөн көрсүбүттэрэ.

Итинник, бастакы күрэхтэһиилэр киин куораппыт «Кыайыы 50 сыла» Спорт дыбарыаһыгар ыытыллыбыт эбит буоллахтарына, 2012 сылтан Д.П. Коркин турнирдара өрүү «Өрөгөй» Спорка бэлэмнэнии киинигэр үрдүк тэрээһиннээхтик буолаллар.

Олимпийскай чемпионнар Таха Акгюль (Турция), Рей Хигучи (Япония), Гено Петриашвили (Грузия), Сослан Рамонов, Заурбек Сидаков (Россия), Комейл Гасеми (Иран); аан дойду чемпионнара Виктор Лебедев (Россия), Франк Чамизо (Италия), Загир Шахиев (Россия), Тайши Нарикуни (Япония); олимпийскай призердар Шиничи Юмота (Япония), Аниуар Гедуев (Россия), Давид Модзманишвили, Георгий Мешвелдишвили (Грузия), Дайчи Такатани (Япония), Артур Найфонов (Россия), уо.д.а. – араас сылларга Д.П. Коркин турнирыгар кыттыбыттара.

Санатан эттэххэ, 2020-2021 сылларга турнир пандемиянан сибээстээн ыытыллыбатаҕа.

Бу турнирга саамай элбэхтик бастаабыт бөҕөһүнэн Виктор Рассадин буолар. Кини аҕыс төгүл пьедестал үрдүкү үктэлигэр тахсыбыта – 2014, 2015, 2017, 2018, 2019, 2023, 2024, 2025 сс.

Петр ПАВЛОВ.  

Хаартыскаҕа: Д.П. Коркин аатынан бастакы күрэхтэһии кыайыылаахтара, 1985 с. Чурапчы.