Конкурс кыайыылааҕа – Эрхаан Константинов

Улуу тренер Дмитрий Петрович Коркин турнирын чэрчитинэн «Өрөгөй» Спорка бэлэмнэнии киинин уонна «Дьулурҕан» тэрийиилэринэн тустууну сэҥээрээччилэргэ конкурс биллэриллибитэ.

Конкурс икки ыйытыылааҕа: Ыйааһыннарынан кыайыылаахтары ааттааҥ уонна Түһүлгэ Бастыҥ бөҕөһүнэн ким буолуой диэн.

Онуоха эрдэ иһитиннэрбиппит курдук, 40 киһи кыттыыны ылла. Кинилэргэ барыларыгар барҕа махтал!

Дьэ, конкурска киирбит сылыктааһыннары хаста эмэтэ сыныйан ааҕыы түмүгэр кыайыылааҕынан суруналыыс Эрхаан Константинов таҕыста. Кини 10 ыйааһынтан – 9-гар сөптөөх хоруйу ыыппыт. Арай, 61 киилэҕэ бэйэтин билсэр киһитэ – аан дойду уонна Азия чемпионаттарын призёра монгол Тувшинтулга Туменбилег бастыа диэбитэ табыллыбата. Ол оннугар иккис ыйытыыга Абасгаджи Магомедов диэн, барыта 10 очколаах инники таҕыста. Манна даҕатан эттэххэ, Эрхан бэйэтин эппиэтин конкурска үһүс киһинэн ыыппыта.

Оттон 13-с киһинэн ыыппыт Порядин уһулуччу көрдөрүүлэннэ диэххэ сөп. Кини, турнир бары кыайыылаахтарын барыларын сөпкө таайбыт (!). Арай, иккис ыйытыыга хоруйдаабатах. Онон эмиэ 10 очколанна. Балаһыанньа быһыытынан маннык тэҥнэһии түгэнигэр, эппиэтин хойут ыыппыт киһи хотторуулааҕынан ааҕыллар.

Ити курдук, Степан, Айсен Молуков, Василий Алексеев, Сэргэй – 9-туу очкону хомуйан, куһаҕана суох көрдөрүүлэннилэр. Эрдэ эппиппит быһыытынан, конкурс эппиэттэрин хас биирдии киһи киирэн көрүөн, бэйэтин сылыктааһынын тэҥнээн көрүөн сөп.

Онон, конкурс кыайыылааҕа Эрхаан Константиновы эҕэрдэлиибит! Эрхаан – көҥүл тустууга ССРС спордун маастара, Саха сирин үтүөлээх тренерэ Н.Н. Константинов уола. Эмиэ тустуу куттаах киһи, тустууну бастыҥ сырдатааччы быһыытынан биллэр. Санатан эттэххэ, кини буолан ааспыт Д.П. Коркин турнирын https://sakhapress.ru сайтка сиһилии сырдатта.

Кыайыылаахха «Өрөгөй» Спорка бэлэмнэнии киинэ (дириэктэр М.Д. Пахомов) олохтообут, турнирга анаан оҥоһуллубут өйдөбүнньүк бирииһэ туттарыллыа уонна биллэриллиэ.

“Дьулурҕан”.