Киирбит усунуос улуустааҕы СВО фондатыгар ананна

Алтынньы ый 26 күнүгэр Ньурба улууһун А.И. Пахомов аатынан Октябрьскай нэһилиэк спорт саалатыгар 2024-2025 спортивнай сезону аһар улуустааҕы эр дьоҥҥо уонна дьахталларга волейболга күрэхтэһиитэ ыытылынна.

Күрэхтэһии үөрүлээх аһыллыытыгар улуус баһылыгын солбуйааччы Н.С. Петрова, улуустааҕы физическэй култуура уонна спорт управление салайааччыта Р.А. Алексеев кыттыылаах ыытылынна.

Ньурбабыт улууһун иһинэн анал байыаннай дьайыы саҕаланыаҕыттан улуустааҕы СВО фондата тэриллэн үлэлиир. Бу манна тэрилтэлэр, биирдиилээн дьон бэйэлэрин кылааттарын киллэрэллэр. Онтон спорт эйгэтин дьоно-сэргэтэ өрүү күүс-көмө буолан кылааттарын киллэрэ тураллар. Маны сэргэ, бу курдук коммерческай хабааннаах күрэхтэһии тэрийэн, хамаандалартан киирбит усунуос СВО фондатыгар бу улуустааҕы волейбол күрэҕиттэн 40000 солкуобай угулунна.

Уопсай түмүккэ, эр дьоҥҥо: 1 миэстэ – Убайаан, 2 миэстэ – Ньурба, 3 миэстэ – РЭС хамаандалара.

Дьахталларга: 1 миэстэ – Антоновка, 2 миэстэ – Таркаайы, 3 миэстэ – Ньурба хамаандалара буоллулар.

Кэлэн кыттыыны ылбыт хамаандаларбытыгар махталбытын тириэрдэбит. Өрүү спорду доҕор оҥостон, бу курдук көхтөөх буоларгытыгар. Салгыы Сомоҕолоһуу күнүн көрсө, сэтинньи 4 күнүгэр мини-футболга улуустааҕы күрэхтэһии ыытыллыа. Күрэхтэн киирбит усунуос СВО фондатыгар киириэҕэ.

Ньурбатааҕы спорт управление пресс-киинэ.