Хатыhыылаах киирсиилэр буолаллара күүтүллэр

Республика саахымакка чемпионатын бастакы лигатыгар алта туур оонньонно.

Алтыс туурга лидердээн испит Хаҥалас хотойо Михайлов Сэмэни (позывнойа – Махай) Дьокуускай куорат иккис оскуолатын сэттис кылааhын үөрэнээччитэ Васильев Артур балайда түөрэҥнэтэн көрдө да, тэҥнэспиттэр эбит. Турнир фавориттара көрсүһүүлэригэр хараларынан оонньообут Николай Капитонов – Николай Бурнашеву бэркэ ыган, ферзэни b1 хонууга атастаhарга күhэйдэ уонна маҥан хонуулаах слона ферзевэй флангаҕа ордубут маҥаннар пешкаларын көҥүл ичигэстээн хотто.

Таатта Бырдьахааннарын сыдьааннара түргэнник үүнэн-сайдан иhэр Иванов Саша (позывнойа – Лукич) республика кыргыттарын биир лидердэрэ Пак Полинаны кытта оонньуутугар пешкатын сиэртибэлээн дуу, былдьатан дуу баран, дьиктиргиэн иhин дуоска киинигэр позициянан баhыйа тутан бэркэ эрийэн хотто.

Чемпионат биир саамай уопуттаах оонньооччута Павел Бекетов эдэр кэскиллээх Местников Давид диэн уолу күүскэ эрийэн-мускуйан итэҕэтиилээхтик хотто.

Онон алта туур кэнниттэн Махай 5,5, Капитонов уонна Лукич 5-тии, Бекетов уонна Васильев Артур 4,5-дыы очколаах лидердээн иhэллэр. Кинилэр кэннилэриттэн биhиги тохсуо буолан саппай уопсан иhэбит. Манна даҕатан эттэххэ, Артур Васильев бастакы туурга оонньооботоҕо. Олоҥхо бухатыырын курдук күн ортото буолуор диэри утуйан хаалбыт үhү. Инньэ гынан иккис тууртан оонньоон лидердэри ситэн ылла.

Сарсын инники эрээккэ Махай – Лукич, Капитонов – Бекетов, Васильева Арина – Васильев Артур, Мосорин – Бурнашев оонньуохтара.

Дьахталлар зачеттарыгар Васильева Арина – 4, Пак Полина – 3,5, Аргунова Сайаана уонна Куприянова (Протодьяконова) Анна – 3-түү очколаах инники иhэллэр.

Күрэхтэhии бүтэрэ аны 3 эрэ туур хаалла. Турнирга түөрт бастакы миэстэни ылбыттар республика эр дьоҥҥо чемпионаттарын үрдүкү лигатыгар оонньуур быраабы ылыахтара. Ол иhин өссө хатыhыылаах киирсиилэр буолаллара күүтүллэр. Онон сэргэхтик туттан олоруҥ.

Дмитрий МОСОРИН.