Эрхаан Константинов: «Өрөгөйдөр Д.П. Коркин турнирын бэркэ тэрийэн ыыттылар»

Эрдэ иһитиннэрбиппит курдук, улуу тренер Д.П. Коркин кэриэһигэр көҥүл тустууга норуоттар икки ардыларынааҕы турнирга анаан тустууну сэҥээрээччилэргэ конкурс тэриллибитэ. Бирииһи «Өрөгөй» Спорка бэлэмнэнии киинин дириэктэрэ Михаил Дмитриевич Пахомов туруорбутугар улахан махтал!

Конкурс кыайыылааҕынан бэйэтэ тустуу куттаах, спорт бу көрүҥүн сылматата суох сырдатааччы, Роман Дмитриев, Анатолий Константинов ааттарынан бэртээхэй буклет-программалар ааптардара, «Сахапресс» сайт үлэһитэ Эрхаан Константинов тахсыбыта.

Бүгүн киниэхэ бирииһэ – Д.П. Коркин турнирыгар анаан оҥоһуллубут өйдөбүнньүк мэтээл туттарылынна.

– Эрхаан Николаевич, бастатан туран, конкурс кыайыылааҕа буолбуккунан эҕэрдэлиибин! Дьэ, быйылгы турниры хайдах, туох санаатыҥ?

– Турнир тэрээһинин олох үчүгэй дии санаатым. Дьону сэргэхситэр инниттэн шоу курдук оҥорбуттара астык дии. Сорохтор этэллэр, ити тоҕо эмиэ ырыаһыттар эҥин диэн. Ону мин этэбин, шоу буоллаҕа дии диэн. Сырыы аайы биирдик буолбакка, уратытык көстөр гына оҥордулар. Куруук тустуу да тустуу буоллаҕына, эмиэ салгымтыалаах дии саныыбын.

Оттон тустууну эттэххэ, мин Лев Павлов финалга тустуутун астымматым. Күрэхтэһии кэнниттэн көрсөн кэпсэппиппэр, эппиэтинэс наһаа улахан этэ, онон тактиканы тутуһан туһуннум диэбитэ.

Александр Авелов уонна Виктор Рассадин тустууларын астынным. Дьиҥэ конкурска Авелов ыйааһыныгар бэйэм табаарыспар Туменбилег Тувшинтулгаҕа ыалдьыбытым. Ол гынан, Авелов эмиэ былырыын А.Медведь турнирыгар курдук, турукка киирэн, хайаан да кыайардыы оҥостон туһунна. Итинник салгыы туһуннаҕына, И.Ярыгин турнирыгар да миэстэлэһиэн сөп дии саныыбын. Саха сирэ уопсайа 7 мэтээли ылла дииллэр. Дьиҥэ, Яков Павлов уонна Максим Толмачев бэйэбит уолаттарбыт буоллаҕа, саха тустууга оскуолатын иитиллээччилэрэ. Онон быйылгы Коркин турнирыттан тоҕус мэтээллэннибит.

Улахан махтал, «Өрөгөй» Спорка бэлэмнэнии киинин дириэктэрэ Михаил Дмитриевич Пахомовка уонна кини бары үлэһиттэригэр. Турниры олох үчүгэйдик тэрийдилэр. Өссө Валерия Дьячковскаяҕа махтал! Суруналыыстар улэлиир усулуобуйаларын тэрийэн, икки күнү быһа аһылыгынан хааччыйбытыгар. Урут итинник суоҕа. Уонна прессаҕа бу сырыыга үчүгэй көрөр-үлэлиир миэстэ тэрийбиттэригэр.

– Оттон конкурс туһунан тугу этиэххин сөбүй?

– Конкурска элбэх киһи кытынна, 40 киһи. Кытаанах конкуренция. Иван Барашков, Андрей Александров, Василий Алексеев, Айсен Молуков, Иван Рожин… Бары тустууну үчүгэйдик билэр дьон. Чиэһинэ эттэххэ, бастыам дии санаабатаҕым. Чэ, холонон көрүөххэ дии санаабытым. Хаһан эрэ эмиэ биирдэ «Дьулурҕан» тустуу конкурсугар кытта сылдьыбытым, онно кыайыылаах Айсен Молуковы кытта тэҥ очкону ылбытым эрээри, эппиэппин кини кэнниттэн ыыппыт буоламмын, сабырыйтарбытым. Михаил Дмитриевич Пахомовка эмиэ улахан махтал! Маннык бириис олохтообутугар.

– Дьэ, бу бириискин долбуургар көстүүлээх гына уурар буоллаҕын дии. Арба, мэтээллэри мунньаҕын дии. Хас буолла?

– Билиҥҥитэ 200-тэн таҕыста.

– ВКонтакте страницаҕар көрбүтүм, итинник сэдэх урукку мэтээллэри хайдах булаҕын?

– Интернеккэ коллекционердар анал сайтара баар. Онтон талан ылан атыылаһабын. Саамай кырата 3 евро эҥин сыаналаах буолар. Саамай кэнники булбут мэтээлим – Александр Медведь турнирын мэтээлэ, биһиги сыанабытыгар таһаардахха – 8 тыһ. солк. тэҥнэһэр. Итини тэҥэ 1964 сыллааҕы, Румынияҕа буолбут турнир кыайыылааҕын мэтээлэ баар.

– Арба, Эрхаан, эн коллекционергын дии. Тустуу литературатын, атрибутикатын мунньаҕын. Хаһан мунньуугун барытын быыстапкалаан көрдөрөҕүн?

– Бэйэм санаабар, коллекциям билигин ситэ илик. Эһиэхэ тэҥнэһэр кыаҕым суох. Ол эрэн, хаһан эмэ быыстапкалыахпын сөп.

Түмүктээн эттэххэ, наһаа үчүгэй турнир буолан ааста. Үс чемпионнаахпыт, тоҕус мэтээллээхпит. Тустуу дьиҥнээх бырааһынньыга буолла. Дьон да астынна быһыылаах. Ити лотерея оонньооппуттара эмиэ үчүгэй. Оннооҕор, турнир кэмигэр иккис этээскэ оҕолорго оонньуур, сынньанар сир оҥорбуттара наһаа үчүгэй. Бу, эмиэ саҥа көстүү. Онон өрөгөйдөр Д.П. Коркин турнирын бэркэ тэрийэн ыыттылар. Маладьыастар! Сылтан сыл ахсын турнир тупсан иһэр.

– Эрхаан, өссө төгүл эҕэрдэ! Биһиги ааҕыыбытынан, эн син эмиэ, Д.П. Коркин турнирын кыайыылааҕынан буоллун. Өссө даҕаны тустууну сырдатыыга айымньылаах үлэҕэр ситиһиилэри баҕарабыт.          

Петр ПАВЛОВ.

Ааптар хаартыскаҕа түһэриитэ.