Сонуннар

Бивол & Бетербиев

Саудовскай Аравияҕа Абу-Даби куоракка орто-ыарахан ыйааһыҥҥа, профессиональнай бокса буолан ааста. Аан дойдутааҕы бокса үс кур хаһаайына, саамай үрдүк чыпчаал версиятыгар, эрдэ Рой Джонс сылдьыбыт. Россияттан биир даҕаны боксер суох эбит. Арай нуучча, кэриэй буккаас хааннаах Константин Цзю, чемпион буола сылдьыбыт. Сергей Ковалев ити титулга тиийиэн кыранан тиийбэтэх.

Дьэ, ол кэннэ сыллар, хотоҕостуу субуллан ааһаллар. Онтон Артур Бетербиев уонна Дмитрий Бивол, Аан дойду боксатыгар тэгил тэҥнээхтэрин булбакка, тэҥҥэ анньыһан кэлэн, харсыһа түстүлэр. Ол аата, икки Россия боксердара, киирсэр буоллулар. Мин иккиэннэрин билэр, эрдэттэн көрөн кэлбит буоламмын, дьэ хайатыгар ыалдьар толкуйга түстүм. Иккиэннэрин да сөбүлүүр боксердарым. Биирдэһэ чечен омук уола, иккиһэ бэйэбит курдук азиат, түүр омук уола.

Артур киирсиитэ барыта дөйүтүүнэн түмүктэммитэ, ол эрээри, аһыттарара мөлтөх буолан, бэйэтэ табыллан, туймааран рингаҕа иккитэ охто сылдьыбыта. Оттон Дима техниката, тактиката үчүгэй эрээри охсуута мөлтөх соҕус. Биирдэ даҕаны табыллан охто илик.

Киирсиилэригэр эрдэ сэрэйбитим курдук, Бивол тэйэ сылдьан сирэйгэ лаппа табыыта элбэх.

Бетербиев харса суох атакалыыр да, утарсааччыта сутуругунан көрсөн табыллан, кэтэҕэ титирээн ылар. Артур табыыта аҕыйах. Үксүн бэрчээккэ нөҥүө табан, охсуута күүстээх буолан Диманы сирэйин дьүккүрүттэ да буоллар, итинник мүччү-хаччы, сиирэ-халты табыыны, судьуйалар ааҕыа суохтаахтар этэ. Бивол хотутар охсуута суох да буоллар, сыҥаахха таптаҕына, Артур кэтэҕэ титирээн табыллара биллэр этэ. Бетербиевка кэнники түөрт рауну биэриэххэ син.

Чэ, онон-манан эргиппэккэ эттэххэ, Дмитрий Биволы кыратык балыйдылар. Ити баҕар Рамзан Кадыров Абу Дабига тиийбитин “өҥөтө” буолуон син. Кини ыйааһына сүрүн оруолу оонньуон эмиэ син. Аймахтыы соҕус мусульман омуктар буоллаҕа. Туох да диэн омугумсуйууга күтүрээһин суох да буоллар, боксаҕа спорт атын да көрүҥэр итинник быһыы баар буолар.

Туох буолуой, Артур Бетербиев эмиэ Россия боксера, саамай үрдүк титулу кини да ыллаҕа дии. Ханнык да атын омук ылбатах.

Бивол өссө да эдэр. Хотторуу хомолтотун биллэхтэринэ, сорох спортсменнар дьэ эбии сытайан туран дьарыктаналлар. Онон кинилэргэ ситиһиини баҕарыаҕыҥ.

Родион Данилов – Ородьумаан.

 

Добавить комментарий

Ваш адрес email не будет опубликован. Обязательные поля помечены *

289246
Бүгүн : 202