Анал бойобуой дьайыы кыттыылаахтарыгар…
Дьокуускай. Дуобат, саахымат республикатааҕы киинигэр анал бойобуой дьайыы кыттыылаахтарыгар уонна уонна кинилэр дьиэ кэргэттэригэр анаан нуучча дуобатыгар күрэхтэһии ыытылынна.
Тэрээһин үөрүүлээх аһыллыытыгар анал байыаннай дьайыы бэтэрээннэрэ кытыннылар, кинилэртэн Россия Геройдара Филипп Евсеев уонна Николай Евдокимов икки ардыларыгар матч оонньонно. Иккиэн даҕаны оҕо сылдьан оскуолаҕа дуобаттаабыттарын, спорт бу көрүҥүн билэллэрин көрдөрдүлэр, ол түмүгэр кыайыыны Н.Евдокимов ситистэ.
Күрэхтэһии дьахталларга уонна эр дьоҥҥо биирдиилээн бастыыр иһин буолла. Ол курдук, дьахталларга тоҕус киһи кыттыбытыгар, кыайыылааҕынан 16 очколаах Татьяна Федорова таҕыста. Киниттэн үс очконан хаалан Марфа Алексеева иккис миэстэни ылла. Үһүс бириистээх миэстэҕэ 11 очколаах Полина Абрамова тигистэ.
Оттон эр дьоҥҥо барыта 18 дуобатчыт күөн көрүстэ. Онуоха түмүккэ 14 очколаах Михаил Копырин кыайда. Иккис миэстэни 10 очкону хомуйбут Станислав Федоров ылла. Үһүс миэстэҕэ 9 очколаах Дмитрий Степанов таҕыста. Эмиэ 9 очколаах Александр Петров, хаачыстыбанан сабырыттаран төрдүс буолла.
Күрэхтэһии чэрчитинэн, соторутааҕыта аҕай дуобакка аан дойду уонна Россия чемпионнара буолан кэлбит Николай Стручков, Тунаара Федорова сеанстара тэрилиннэ.
Күрэхтэһии тэриллиитигэр «Водоканал» тэрилтэ (генеральнай дириэктэр А.А. Кырджагасов), «Охотник на Ярославского» маҕаһыын (дириэктэр А.П. Дарбасов), «Копиртехсервис» тэрилтэ (генеральнай дириэктэр А.Т. Никифоров), «Цикл» тэрилтэ (генеральнай дириэктэр Н.М. Данилов күүс-көмө, өйөбүл буолбуттарыгар тэрийээччилэр барҕа махталларын тиэрдэллэр.
«Дьулурҕан».