Ааҕааччы биһирэбилин ыларыгар эрэллээхпин
Улуу тренер Дмитрий Петрович Коркин кэриэһигэр көҥүл тустууга норуоттар икки ардыларынааҕы турнир чэрчитинэн алтынньы 20 күнүгэр Саха сирин уонна Россия үтүөлээх тренерэ Будимир Григорьевич Яковлевка анаммыт «Тустуу аргыстаах олох» диэн саҥа тахсыбыт кинигэ сүрэхтэниитэ буолар.
Кинигэ дьоруойа Будимир Григорьевич бу үлэни – тренеригэр, олоххо суолун буларыгар сирдээбит күндү киһитигэр – ССРС, РСФСР, Саха АССР үтүөлээх тренерэ, Саха сирин оскуолаларын үтүөлээх учуутала, ХХ үйэ уһулуччулаах киһитэ Дмитрий Петрович Коркин сырдык кэриэһигэр аныыр.
Кинигэҕэ көҥүл тустууга ССРС спордун маастара, Саха сирин уонна Россия үтүөлээх тренерэ Будимир Григорьевич Яковлев оҕо сааһын, студеннаабыт сылларын, тренер быһыытынан таһаарыылаах үлэтин туһунан кэрэһэлиир араас кэмҥэ бииргэ алтыспыт дьонун-сэргэтин, үөлээннээхтэрин, доҕотторун-атастарын, эрчийбит уолаттарын, дьиэ кэргэнин ахтыылара, суруйуулара тиһиллэн киирдилэр.
Ону сэргэ Будимир Григорьевич олоҕун арылыччы арыйан көрдөрөр хаартыскалар кинигэни ситэрэн-хоторон биэрдилэр. Саҥа киллэрии быһыытынан, куар-кодтарынан киирэн интервьюлары, маастар-кылаастары, эрчиллиилэр видеоларын көрөн кэрэхсиэххитин сөп.
Үөһэ этэн аһарбытым курдук, кинигэ биһиги улуу тренербит Д.П. Коркиҥҥа анаммытын быһыытынан, кини туһунан суруйуу, сырдатыы, ахтыы элбэх. Ахтыылар бары үчүгэйдэр, дьоруой олоҕун арыйан, кинигэ ис хоһоонун байытан, маарыҥнаспат гына ситэрэн-хоторон биэрэллэр. Түгэнинэн туһанан, ахтыы биэрбит дьоҥҥо барыгытыгар барҕа махтал!
Манна Б.Г. Яковлев тустуу эйгэтигэр бииргэ алтыспыт дьоно: Александр Медведь, Даулет Турлыханов, Иван Сивцев, Степан Сивцев, Сергей Дмитриев, Семен Макаров, Михаил Каженкин, Николай Крылов, Сергей Корнилов, иитиллээччилэрэ Петр Юмшанов, Леонид Спиридонов, Владислав Андреев, Иннокентий Иннокентьев уо.д.а. ылыннарыылаахтык ахтыыларын ааҕыаххытын сөп.
Кинигэ – дизайнер, СР Бэчээтин туйгуна Кларника Гоголева таҥан оҥоруутунан – Новосибирскайга, 1000 ахсаанынан үчүгэй хаачыстыбалаахтык, халыҥ тастаах, 270 страницалаах, өҥнөөх хаартыскалардаах бэчээттэнэн таҕыста.
Чэ, кинигэни кылгастык билиһиннэрдэххэ итинник. Аахпыт, көрбүт дьоннор бэйэҕит сыаналыаххыт буоллаҕа…
Манна даҕатан эттэххэ, сыл иһигэр биир кэмҥэ тэбис-тэҥҥэ түөрт кинигэҕэ үлэлэһэн – төрдүөннэрэ таҕыста! Бу – РФ, СР үтүөлээх тренерэ Б.Г. Яковлев туһунан кинигэм – төрдүс үлэм. Ити барыта хамнастаах үлэ, хаһыат түбүктээх, кэлиилээх-барыылаах үлэтин таһынан, иллэҥ кэмҥэ эрэ үлэ. Дьэ, аны, бэйэм кинигэбэр ылсабын…
«Тустуу аргыстаах олох» кинигэ сүрэхтэниитэ бу өрөбүлгэ – алтынньы 20 күнүгэр «Өрөгөй» Спорка бэлэмнэнии киинин С блогар, үһүс этээскэ баар актовай саалаҕа 16:00 чаастан саҕаланар.
Петр ПАВЛОВ, РФ Суруналыыстарын сойууһун чилиэнэ, СР Бэчээтин туйгуна, «Дьулурҕан» хаһыат редактора.