Уолбут Роман Николаев аатынан сквер аһылынна

Кырдьаҕас Бүлүү куораппыт 390 сылыгар сөп түбэһиннэрэн, анаан-минээн уолбут, убайбыт, бырааппыт Роман Леонидович Николаев аатынан спортивнай былаһаакканы-сквери доҕотторо, аймахтара тутан бэлэх оҥордулар.

Биһиги уолбут бу Оруктаах эбэ кытыытыгар элбэхтик сүүрбүт-көппүт, көччүйбүт, күөлэһийэ сөтүөлээбит сирэ, онон бу суолталаах тутуу. Кыра эрдэҕиттэн үгүс доҕоттордоох этэ, ханна да тиийбитин иһин үөрэ-көтө көрсөллөрө. Спорка кылгас да олоҕу олордор кэккэ ситиһиилэрдээҕэ.

СӨ хапсаҕайга маастара, “Азия оҕолоро” оонньуу кыттыылааҕа, М.Е. Николаев аатынан стипендиата, үгүс СӨ, Уһук Илин, Арассыыйа турнирдарын кыайыылааҕа, Бүлүү улууһун хас да сыл бастыҥ спортсмена, Бүлүүтүн, Академиятын аатын элбэхтик көҥүл тустууга, хапсаҕайга, самбоҕа, боксаҕа көмүскээбитэ.

Суох буолбут тиһэх күнүгэр өрөспүүбүлүкэбит араас улуустарыттан доҕотторо бөҕө кэлэн кутурҕаммытын тэҥҥэ үллэстибиттэрэ. Бу да сырыыга куорат кытыытыгар турар Оруктаах сиригэр доҕотторо, дьон-аймах бөҕөтө тоҕуоруһа муһуннулар. Элбэх истиҥ тыллары, ахтыылары иһиттибит. Баара буоллар хайаан да үрдүк сололоох, дуоһунастаах, дьон туһугар олус кыһаллыа этэ дииллэр. Бэл диэтэр, аҕамсыйбыт дьон кэлэн кууһан туран уолбутугар, сиэммитигэр кыһалҕалаах кэмнэригэр, үөрэхтэригэр да көмөлөспүтүн этиммиттэрэ, махтаммыттара истиэххэ олус долгутуулаах этэ.

Сквери тутуоҕуҥ диэн Ромкабыт оҕо сааһын доҕоро, биир дьиэҕэ ыаллыы олорбут оҕобут, Бүлүү улууһун ытыктанар ыалларын, СӨ физическэй култуураҕа уонна успуорка үтүөлээх үлэһитэ Николай Николаевич, СӨ доруобуйатын харыстабылын туйгуна Октябрина Андреевна Васильевтар тутууһут идэлээх уоллара – Владислав Николаевич буолар.

Бүлүү куоратын мээрэ Попов Я.А. сир анаан, тутууга көмөлөһөн, бу СК Саха Билдинг (ген. дириэктэрдэр Васильев В.Н., Прохоров И.Г.), ООО ,,Адем,, (Григорьев А.А.), иилээн-саҕалаан, үс тустуу маастара, тренерэ Соловьев Виктор Афанасьевич салайыытынан, Ромкабыт, биһиги үгүс доҕотторбут үбүнэн, техниканан, уһанан отой эрдэ тутуллан киирдэ. Манна кэрэ сибэккилэр үүнэр клумбалара, сынньанарга ыскамыайкалар, хачыаллар, дьарыктанарга араас тренажердар табыгастаахтык оҥоһуллубуттар.

Онон уолбут аата үйэлэргэ үйэтитилиннэ. Арыллыыга улуус баһылыга Винокуров С.Н., куорат баһылыгын солбуйааччы Иванов Н.В., СӨ успуорка министирин солбуйааччы Антонова А.К., Оруктаах түөлбэтин олохтооҕо Николаева Г.И., спортивнай комментатор Васильев А.В. – Көрдүгэн, Ромкабыт бастакы учуутала Дабдасова З.В., доҕотторо Попов Володя, Былатыан Саввинов олус истиҥник санаан ахтыы оҥордулар, тула мустубут дьон ытыс тыаһынан бигэргэтэн биэрдилэр.

Бэйэбит төрөппүттэр ааттарыттан махтал тылларын анаатыбыт. Бу сквер оҕо-аймах оонньуур, эдэр ыччат дьарыктанар, олохтоохтор сынньанар кэрэ миэстэлэрэ буолуо диэн дуоһуйан тарҕастыбыт. Сквер арыллыытыгар куорат мэрията, ,,Алгыс,, сынньанар киин үлэһиттэрэ, Т.Колесова салайар үҥкүү бөлөҕө, Бүлүүтээҕи колледж уһуйааччылара киэргэтэн ыыппыттарыгар махталбытын тиэрдэбит.

СӨ физическэй култуураҕа уонна успуорка үтүөлээх үлэһитэ, СӨ үөрэҕириитин туйгуна, Бүлүү куорат, Өлөөн нэһилиэгин бочуоттаах олохтооҕо, СӨ хапсаҕайга успуордун маастара, ХХ үйэ бастыҥ хапсаҕайдьыта Леонид Романович, Кыргыдай нэһилиэгин бочуоттаах олохтооҕо, РФ орто анал үөрэҕин кыһатын бочуоттаах үлэһитэ, СӨ үөрэҕириитин туйгуна Варвара Петровна НИКОЛАЕВТАР.