Улуу тренергэ сүгүрүйэн…

Бүгүн, балаҕан ыйын 5 күнүгэр – Р.М. Дмитриев аатынан Олимпийскай эрэл училищетын иннигэр улуу тренер Дмитрий Петрович Коркин төрөөбүт күнүгэр, кини пааматынньыгын таһыгар, олохсуйбут үгэс быһыытынан үөрүүлээх миитин, сибэкки дьөрбөтүн ууруу сиэрэ-туома буолла.

Бэлиэ түгэҥҥэ «Өрөгөй» Спорка бэлэмнэнии киинин дириэктэрэ Михаил Пахомов, олимпийскай чемпион Павел Пинигин, олимпийскай призёр Александр Иванов, үс Олимпиада кыттыылааҕа Айаал Лазарев, Д.П. Коркин кэргэнэ Александра Семеновна кыттыыны ыллылар, ахтыы оҥордулар.

ССРС, РСФСР, Саха АССР үтүөлээх тренерэ, республика үтүөлээх учуутала, ХХ үйэ бастыҥ киһитэ Дмитрий Петрович Коркин сырдык аатыгар сүгүрүйэн Олимпийскай училище үөрэнээччилэрэ, куорат олохтоохторо, спорт бэтэрээннэрэ муһуннулар.

Тэрээһиҥҥэ өссө Үтүө Дьулуур оонньууларын кыайыылааҕа, спорт үтүөлээх маастара Василий Гоголев, Россия уонна Саха Республикатын үтүөлээх тренерэ Будимир Яковлев, Саха сирин көҥүл тустууга сүүмэрдэммит хамаандатын сүрүн тренерэ Вадим Семенов, аан дойду чемпиона Герман Контоев курдук биллиилээх дьон кытыннылар.

Санатан эттэххэ, Дмитрий Петрович Коркин кэриэһигэр көҥүл тустууга быйылгы норуоттар икки ардыларынааҕы турнир алтынньы 17-20 күннэригэр ыытыллар. Турнир чэрчитинэн улуу тренергэ анаммыт киинэ көрдөрүүтэ саҕаланыа диэн Михаил Пахомов иһитиннэрдэ.

Дьулурҕан.