“Тумус туттар дьоммут ааттарын үйэтитэргэ күүскэ үлэлэһиэххэ”

Балаҕан ыйын 14 күнүгэр Майаҕа, «Манчаары» стадиоҥҥа саха саарына, дэгиттэр талааннаах Аркадий Михайлович Алексеев рекордтарын 60 сылыгар аналлаах күрэхтэһии ыытыллар. Бу күрэс түһүлгэтин көрсө, бу дьыл ыам ыйын 8 күнүгэр Николай Николаевич Тарскай төрөөбүтэ 100 сылыгар аналлаах «төгүрүк остуолга» көрсөн сэһэргэспиппин, бу кэмҥэ тоҕоостоох дии санаан санатарбын көҥүллээҥ.

Аатырбыт ырыаһыт, биллиилээх мелодист, үрдүк көрдөрүүлэрдээх спортсмен, тыа сирин успуордун салайааччытынан ситиһиилээхтик үлэлии сылдьыбыт сахалар улаханнык ытыктыыр, сүгүрүйэр киһибит Аркадий Михайлович Алексеев бу бэлиэ күҥҥэ, Н.Н. Тарскайтан ылбыт наҕараадаларын – грамоталарын, дипломнарын уонна сэдэх хаартыскаларын аҕалан көрдөрөн, кэпсээн, мустубут дьон сэҥээриилэрин ылбыта.

Итини сэргэ Аркадий Михайлович, успуорт эйгэтигэр үлэлээбит киһи быһыытынан, бэйэтин санааларын эппитэ. Ол курдук, ханнык баҕарар норуот киэн туттар киһилээх буолуохтаах диэн туран, биһиги, сахалар оннук, тумус туттар дьоруойдаах буолуохтаахпыт, оннук дьоммутун умнууга хаалларбакка, кинилэр ааттарын үйэтитиигэ күүскэ үлэлэһэргэ диэбитэ. Холобур, көҥүл тустууга сахалартан бастакынан уолаттарга Сойуус чөмпүйүөнүнэн буолбут Вячеслав Карпов аатынан күрэхтэһии тэриллэн иһэн уостан хаалбытын сөргүтэргэ санаппыта. Итиэннэ кини өрөспүүбүлүкэҕэ хайыһар успуордун киэҥник тэнитэн ыытарга ыҥырбыта.

Майатааҕы, А.М. Алексеев аатынан “Кус быһый, ат бөҕө” күрэхтэһиигэ Дьулустан Ноговицын, Артем Ветров, Владимир Федоров, Гарри Сдвижков, Павел Друзьянов, Вениамин Попов, Савва Копырин курдук Саха сирин чулуу боотурдара – хапсаҕайга, 400 м сүүрүүгэ, мас тардыһыытыгар, ыараханы көтөҕүүгэ, үҥүүнү быраҕыыга ким бастыҥын быһаарсыахатара. Муҥутуур кыайыылаахха сүрүн бириис – 500 тыһ. солк. Күрэхтэһии сарсыарда 10:00 чаастан саҕаланар.  

Петр ПАВЛОВ.

Ааптар видеоҕа уонна хаартыскаҕа түһэриилэрэ.