Судаарыстыбаннас күнүгэр Н.Н. Тарскайга өйдөбүнньүк

Бүгүн, балаҕан ыйын 27 күнүгэр Н.Н. Тарскай аатынан «Туймаада» стадиоҥҥа, саха спордун талааннаах салайааччыта, төлөннөөх тэрийээччитэ Николай Николаевич Тарскай стендэтин уонна өйдөбүнньүк бэлиэтин үөрүүлээхтик аһыы буолла.

Ол курдук, стадион манеһын киирии аанын фойетыгар, биллиилээх киһиэхэ аналлаах кини олоҕун, үлэтин кэпсиир-көрдөрөр стендэ уонна стеклопластиктан кутуллубут үкчү бэйэтин үрдүгүнэн өйдөбүнньүк бэлиэ оҥоһуллубут. Тэрээһиҥҥэ өрөспүүбүлүкэ спорка салалтата, тренердэр, спортсменнар, спорт бэтэрээннэрэ, Н.Н.Тарскай биир дойдулаахтара – уус алданнар кыттыыны ылан, Саха спордун аҕатынан билиниллибит киһиэхэ сүгүрүйүүлэрин, ытыктабылларын уонна кэриэстэбиллэрин биллэрдилэр.

Кэрэ бэлиэ түгэҥҥэ Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Местников, Саха сирин физическэй култуураҕа уонна спорка министрин бастакы солбуйааччы Гаврил Мохначевскай, Ил Түмэн дьокутаата Геннадий Васильев, Н.Н. Тарскай төрөөбүт дойдутуттан – Уус Алдан улууһун Баатаҕай нэһилиэгин баһылыга Михаил Белолюбскай, өр сылларга Саха спордун ситиһиилээхтик салайбыт үтүөлээх үлэһит, Манчаары оонньууларын төрүттээбит өрөспүүбүлүкэ бочуоттаах бэтэрээнэ Афанасий Егорович Алексеев, Н.Н. Тарскай сиэнэ, Дьокуускай куорат 31 №-дээх оскуолатын дириэктэрин солбуйааччы Людмила Кулагина, уо.д.а. кыттыыны ыллылар.

Быйыл, Николай Николаевич Тарскай үбүлүөйдээх сылынан, АЛРОСА тэрилтэ Накыыҥҥа көстүбүт 66,62 караттаах алмааска Н.Н. Тарскай аатын иҥэрбитэ. Бу ураты көстүүлээх күндү тааһы, АЛРОСА эппиэттээх үлэһитэ үөрүүлээх быһыы-майгы ортотугар Гаврил Мохначевскайга туттарда. Аны бу алмаас Н.Н. Тарскай аатынан стендэҕэ көрдөрүүгэ туруоруллуоҕа.

Тэрээһин – Саха Өрөспүүбүлүкэтин Судаарыстыбаннаһын күнүгэр ыытыллыбытынан өссө уратылаах буолла уонна Н.Н. Тарскай төрөөбүтэ 100 сылыгар ананан тэрилиннэ.

PS: үөрүүлээх түгэҥҥэ Афанасий Егорович Алексеев уонна Людмила Кулагина кылгас видео ахтыыларын Дьулурҕан телеграмҥа каналыгар t.me/dzulurgan көрүөххүтүн сөп.

Петр ПАВЛОВ.

Ааптар хаартыскаҕа түһэриилэрэ.