Сонуннар ситимнэрэ

Дуобатчыттарбыт ситиһиилэннилэр

Москва уобалаһыгар нуучча дуобатыгар аан дойду чемпионата ыытылынна. Хаһан баҕарар буоларыныы, спорт бу көрүҥэр биир дойдулаахтарбыт дьоһун ситиһиилэннилэр.

Ол курдук, чемпионат түмүгүнэн Апросимова Сандаара Түргэн оонньууга дьахталларга бастаата, Классическай оонньооһуҥҥа эр дьоҥҥо 5-с төгүлүн Николай Стручков чемпионнаата. Дьахталларга эдэркээн Тунаара Федорова кыайда. Ону тэҥэ кини Түргэн оонньууга үһүс көрдөрүүлэннэ. Онон бу чемпионаттан саха дуобатчыттара түөрт мэтээллэннилэр.

Кыайыылаахтарга уонна кинилэр тренердэригэр Эҕэрдэ!

Дьулустаан Ноговицын кыайда

Майа сэлиэнньэтин «Манчаары» стадионугар саха саарына, дэгиттэр талаан Аркадий Алексеев үҥүүнү быраҕыыга уонна пятиборьеҕа муҥутуур көрдөрүүнү олохтообута 60 сылыгар аналлаах «Кус быһый-ат бөҕө» биэс көрүҥүнэн күөн күрэс тэрилиннэ.

Сахабыт сирин аҕыс чулуу боотурдара: Егор Терентьев, Гарри Сдвижков, Владимир Федоров, Дьулустаан Ноговицын, Павел Друзьянов, Вениамин Попов, Савва Копырин, Данил Моисеев – хапсаҕайга, 400 миэтэрэҕэ сүүрүүгэ, мас тардыһыыга, ыараханы өрө тардыы, үҥүүнү быраҕыы көрүҥнэригэр күрэс былдьастылар.

Түмүккэ Дьулустаан Ноговицын бастаата, Владимир Федоров иккис буолла, Павел Друзьянов үһүстээтэ. Муҥутуур кыайыылаах 500 000 солкуобай уу харчынан наҕараадаланна.

“Боотурдар оонньууларыгар”

Көҥүл тустууга сахалартан аан дойдуга бастакынан чемпионнаабыт Илларион Федосеев кэриэһигэр “Боотурдар оонньуулара” спортивнай тустуу өрөспүүбүлүкэтээҕи бэстибээлигэр 24 улуустан 1200 эдэр бөҕөс күөн көрүстэ.

Кинилэр саастарынан араарыллыбыт аҕыс бөлөххө (4 көҥүл тустууга, 2 гректии-римнии тустууга уонна 2 кыргыттар тустууларыгар) ким күүстээҕин быһаарыстылар. Түмүккэ Дьокуускай хамаандата 17 бастакы миэстэни ылан үчүгэй көрдөрүүлэннэ. Бастыҥ тренеринэн – бу хамаанда тренерэ Николай Яковлев ааттанна.

Мэҥэ Хаҥалас алта чемпионнаах, оттон Чурапчы, Ньурба, Сунтаар хамаандалара түөртүү бастакы миэстэлээхтэр.

“Дьулурҕан”.