Коркинныы олоруохха. Коркинныы айыахха!

Балаҕан ыйын 5 күнүттэн – 14 күнүгэр диэри, сыллата ыытыллар «Коркинныы олоруохха! Коркинныы айыахха!» диэн ССРС, РСФСР, Саха АССР үтүөлээх тренерэ Дмитрий Петрович Коркин аатынан быыстапка үлэлиир.

Бу, киин куораппыт “Строительнай” рыногын быыстапкалыыр саалатыгар тэриллэр республикатааҕы таһымнаах быыстапка тэриллэрэ үтүө үгэскэ кубулуйда. Тэрээһини, Дмитрий Петрович үөрэнээччитэ, Саха Республикатын култууратын үтүөлээх үлэһитэ Татьяна Афанасьевна Гоголева үүннээн-тэһииннээн алтыс сылын ыытар. Сылтан сыл ахсын быыстапка таһыма улаатан, сайдан, кэҥээн иһэрэ кэрэхсэбиллээх. Бииртэн биир үчүгэй экспонаттаах дьоннор кыттыһан иһэллэр.

Быйылгы быыстапкаҕа Чурапчы, Эдьигээн, Амма, Уус Алдан улуустарын тэҥэ, национальнай библиотека, Ем. Ярославскай аатынан Саха сирин историятын музейа, Р.М. Дмитриев аатынан Олимпийскай эрэл училищета, республика спорка Албан аатын музейа, биллиилээх коллекционердар Юрий Щукин, Михаил Друзьянов, Петр Павлов, олимпийскай чемпион Павел Пинигин, Олимпиада-76 үрүҥ көмүс призера Александр Иванов, Д.П. Коркин үөрэнээччитэ, СР үөрэҕириитин туйгуна Дмитрий Егоров, СР үтүөлээх тренерэ Афанасий Лугинов, Саха сирин киэн туттуулара Контоевтар дьиэ кэргэттэрэ уонна көҥүл тустууга спорт маастара, РСФСР чемпиона Алексей Стручков баай ис хоһоонноох экспонаттара киэҥ эйгэҕэ көрдөрүүгэ туруорулуннулар.

Күндү куорат олохтоохторо уонна ыалдьыттара! Быыстапка чэрчитинэн күннэтэ ыытыллар лекцияларга, “төгүрүк остуолларга”, саҥа кинигэлэр сүрэхтэниилэригэр кэлэн көхтөөхтүк кыттыҥ, көрүҥ, сэргээҥ, санааҕытын үллэстэн кэпсэтиҥ, сиһилии сэһэргэһиҥ.

Буолар сирэ: Дьокуускай куорат, “Строительнай” атыы-эргиэн киинин быыстапкалыыр саалата, Жорницкай уул. 35 №-рэ (кыһыл дьиэ), бастакы этээс. Билсэр тел: 8-999-949-48-90.

Тэрийэр бөлөх.