Сүрэхпитигэр өрүү тыыннаах буолуоҕа

// Кэриэстэбил

Тапталлаах кэргэним, аҕабыт, эһээбит, Нам улууһун олохтооҕо, үлэ уонна спорт бэтэрээнэ Иван Петрович Охлопков бу дьыл атырдьах ыйын 30 күнүгэр төрөөбүт улууһугар Уус Алдаҥҥа тиийэ сылдьан ыарахан ыарыыттан соһуччу олус хомолтолоохтук күн сириттэн букатыннаахтык баран, барыбытын улаханнык соһутта…

Иван Петрович ыам ыйын 21 күнүгэр 1956 сыллаахха Уус Алдан оройуонун Бэрт Ууһун нэһилиэгэр, Чирэпчи учаастагар Евдокия Егоровна Ширяева, Петр Иванович Охлопков дьиэ кэргэнигэр бастакы оҕонон күн сирин көрбүтэ. Бииргэ төрөөбүт төрдүөлэр.

1975 сыллаахха Сыырдаах орто оскуолатын бүтэрэн, Суоттуга, СПТУ-га үөрэнэ киирбитэ. Суоппар идэтин баһылаан «Лена», «Сардаҥа» совхозтарга үтүө суобастаахтык үлэлээбитэ.

1980 сыллаахха олоҕун аргыһынаан Екатерина Гаврильевналыын ыал буолан, уоллаах кыыс оҕолонон – ийэ, аҕа буолар дьолун билбиттэрэ. Кинилэр Нам улууһугар олохсуйбуттара.

Иван Петрович лесопууҥҥа суоппарынан, механигынан, онтон салгыы райпо, «Эрэл» тэрилтэлэригэр механигынан ситиһиилээхтик үлэлээбитэ.

Оҕо сааһыттан спордунан сөбүлээн дьарыктаммыта. Ол курдук, оскуолаҕа ахсыс кылааска үөрэнэ сылдьан республикатааҕы ориентирование күрэхтэһиитигэр бастакы миэстэни ылары ситиспитэ. Мантан ыла спорт эйгэтигэр киирэн – волейбол, баскетбол, атах оонньууларын көрүҥнэригэр араас таһымнаах күрэхтэһиилэргэ кыттан, оскуолатын, тэрилтэтин, улууһун чиэһин ситиһиилээхтик көмүскээбитэ. «Урожай» спортивнай общество, «СахаВА» волейбол ассоциациятын ыытар тэрээһиннэригэр өрүү көхтөөхтүк кыттара. Элбэх бочуотунай грамоталарынан, анал бириистэринэн наҕараадаламмыта.

Ол туоһутунан Саха Республикатын спорка уонна физическэй култуураҕа бэтэрээнэ, Нам улууһун спордун бэтэрээнэ, Саха сиригэр физическэй култуура хамсааһынын 100 сылыгар анаммыт анал бэлиэлэринэн наҕараадаламмыта буолар.

Кэнники сылларга доруобуйатын туруга мөлтөөн Дьокуускайга, Томскайга үс улахан операцияны ааспыта. Иккис группалаах инбэлиит буолбута. Ол да буоллар, спордунан дьарыктанарын тохтоппотоҕо. Дартска, остуол тенниһигэр, саанын ытыыга, волейболга – улууска уонна республикаҕа ыытыллар күрэхтэһиилэргэ кыттан, өрүү бастыҥнар кэккэлэригэр сылдьара.

Төрөөбүт-үөскээбит, оҕо сааһа ааспыт Чирэпчитигэр, Сыырдааҕар сылын аайы тиийэн дьонун-сэргэтин көрсөн, от оттоон, мас мастаан, сир астаан, үөрэн-көтөн кэлэрэ.

Иван Петрович Нам сирин таптаан, сөбүлээн иккис дойду оҥостон 44 сыл быр-бааччы олорон, дьиэ-уот тэринэн, тапталлаах аҕа, амарах эһээ этэ.

Иван Охлопков спорка кэккэ ситиһиилэрэ:

1974-1975 сс. волейболга үөрэнээччилэр икки ардыларынааҕы күрэхтэһии кыайыылааҕа.

1972-1980 сс. Уус Алдан оройуонун волейболга хас да төгүллээх чемпиона уонна призера.

1974, 1979, 1987 сс. «Урожай» спортивнай общество уобаластааҕы сэбиэтин волейболга чемпиона уонна призера (Амма, Чурапчы, Нам-1 Хомустаах).

1976, 1978, 1984 сс. Саха АССР волейболга күрэхтэһиитин үс төгүллээх призера, Саха сирин норуоттарын 8-сыс спартакиадатын призера. «Трудовые резервы» спортивнай общество баскетболга күрэхтэһиитин үһүс призера.

1996-2012 сс. Нам улууһун волейболга хас да төгүллээх кыайыылааҕа уонна призера. СахаВА бэтэрээннэргэ лигатын хас да төгүллээх призера.

2016 с. доруобуйаларынан хааччахтаах дьоннор күрэхтэһиилэрин үрүҥ көмүс призера (Амма, Чакыр).

2016 с. волейболга доруобуйаларыгар хааччахтаах дьоҥҥо республика чемпиона.

2017 с. волейболга доруобуйаларыгар хааччахтаах дьоҥҥо республика чемпиона (Мэҥэ Хаҥалас, Майа).

2023 с. волейболга доруобуйаларыгар хааччахтаах дьоҥҥо республика чемпиона (Таатта, Ытык Күөл).

2023 с. Кронхол диэн спорт көрүҥэр Нам улууһун спартакиадатыгар иккис миэстэлээх.

2023 с. Дартска бэтэрээннэр кыһыҥҥы спартакиадаларыгар үһүс миэстэлээх.

2024 с. Дартска Нам улууһун спартакиадатыгар үһүс миэстэлээх.

2024 с. Джакколо диэн көрүҥҥэ Нам улууһугар эр дьоҥҥо чемпион.

Күндү киһибит Иван Петрович ситэ олорботох олоҕун оҕолоро, сиэннэрэ салгыахтара. Тапталлаах кэргэним, амарах аҕабыт, үтүө сүрэхтээх эһээбит биһиги сүрэхпитигэр өрүү тыыннаах буолуоҕа.

Кэргэнэ, оҕолоро, сиэттэрэ.