Алексей Стручковтуун истиҥ көрсүһүү

“Строительнай” атыы-эргиэн киинин быыстапкалыыр саалатыгар «Коркинныы олоруохха. Коркинныы айыахха» диэн улуу тренер Дмитрий Петрович Коркиҥҥа аналлаах алтыс өрөспүүбүлүкэтээҕи быыстапкаҕа күннэтэ сэргэх тэрээһиннэр ыытыллаллар.

Бүгүн биллиилээх тустуук, ССРС успуордун маастара, Сэбиэскэй Сойуус уонна Арассыыйа тыатын сирин бөҕөстөрүн кыайыылааҕа, РСФСР чөмпүйүөнэ, А.Медведь бирииһигэр норуоттар икки ардыларынааҕы турнирга бастакы миэстэлээх, Саха сирин икки төгүллээх чөмпүйүөнэ Алексей Стручкову кытта көрсүһүү тэрилиннэ. Наһаа истиҥ көрсүһүү буолла диэн сыаналыыбын. Алексей Романович кыыһа, сиэнэ, биир дойдулаахтара, кылааһынньыктара кинини чулуу спортсмен, бастыҥ тутааччы уонна улуус мунньаҕын дьокутаатын быһыытынан сиһилии арыйан ахтыы оҥордулар, кэпсээтилэр.

Көрсүһүү, улуу тренер Дмитрий Петрович Коркин биир маанылаан илдьэ сылдьыбыт, такайбыт иитиллээччитигэр ананан ыытыллыбыта кэрэхсэбиллээх. Алексей Стручков бэйэтэ сэмэй киһи. Бастыҥ бөҕөс, чулуу үлэһит да буолан баран, бэйэтин туһунан ыһа-тоҕо кэпсэммэтэх, урукку кэмҥэ бэчээккэ даҕаны улаханнык сырдатыллыбатах киһи.

Ону, Чурапчы успуорка интэрнээт-оскуолатыгар бииргэ үөрэммит доҕоро, Саха Өрөспүүбүлүкэтин наукатын уонна үрдүк үөрэхтээһинин бочуоттаах үлэһитэ, СӨ үөрэҕириитин туйгуна, общественник, суруналыыс, тустуу туһунан кинигэлэр ааптардара Дмитрий Афанасьевич Егоров – Алексейы тылыгар киллэрэн, маннык тэрээһини бэйэтэ иилээн-саҕалаан ыытта диэхтээхпит. Быыстапкаҕа Алексей Романович олоҕун, спорка уонна үлэҕэ ситиһиилэрин туоһулуур элбэх хаартыскалар уонна мэтээллэр анал стендэҕэ көрдөрүүгэ туруорулуннулар.

Манна даҕатан эттэххэ, Дмитрий Афанасьевич – Алексей Стручков туһунан “Дьулурҕан” хаһыакка биир балаһанан “Коркин маанылаабыт ылгын уола” диэн суруйан таһааттарда, аны кинигэ бэлэмнээн, сотору күн сирин көрдөрөөрү сылдьар. Санатан эттэххэ, кини бу иннинэ чулуу бөҕөстөр Иннокентий Аянитов, Михаил Ноговицын тустарынан диэн ааҕааччылар биһирэбиллэрин ылбыт кинигэлэри оҥорон, бэлэмнээн таһаарбыта. Алексей Стручков да туһунан кинигэ үчүгэй буолуохтаах диэн бүк эрэнэбит.

Бу көрсүһүү, А.Р. Стручков балаҕан ыйын 14 күнүгэр 65 сааһын туолар үбүлүөйүн чэрчитинэн ыытыллыбыта үөрүүлээх, бэлиэ түгэн диэххэ сөп. Бастыҥ спортсмеҥҥа, чулуу үлэһиккэ маннык болҕомто ууруллан, этэргэ дылы, кини олоҕун биир кэрчик кэмин сыаналааһын буолар.

Түгэнинэн туһанан, куорат олохтоохторун уонна ыалдьыттарын “Коркинныы олоруохха. Коркинныы айыахха” быыстапкаҕа ыҥырабыт. Быыстапка балаҕан ыйын 15 күнүгэр диэри үлэлиир.  

Петр ПАВЛОВ.      

Ааптар хаартыскаҕа түһэриитэ.