Олимпиецтарбытын атарахсытымыахха
Дагестаннар көҥүл тустууга олимпийскай чемпионнарын, призёрдарын тэҥэ, политическай балаһыанньанан Олимпиадаҕа кыттыбакка хаалбыт бөҕөстөрүн эмиэ чиэстээтилэр, харчынан ботуччу бириэмийэлээтилэр, бэлэх-туһах бөҕө биэрдилэр.
Ити курдук, Чечня уонна Хотугу Осетия республикалара эмиэ бэйэлэрин спортсменнарын үөрүүлээхтик көрсүбүттэрин уонна наҕараадалаабыттарын туһунан социальнай сеттэргэ суруйдулар, көрдөрдүлэр аҕай. Оттон биһиги?
Дьиҥэ түөрт сылга биирдэ ыытыллар оонньууга кыттар кыахтаммыт Виктор Рассадины, Айаал Лазаревы, Владимир Егоровы, Георгий Окороковы, Сардаана Трофимованы, кинилэр тренердэрин кытта көрсүһүүнү тэрийиэххэ баара. Ону тэҥэ, олимпиец аатын ылан баран кыттыбатах тустуукпут Арыйаан Тютрин эмиэ умнуллуо суохтаах дии саныыбын. Кинилэри кытта көрсүһүүнү атах-бытах биирдиилээн буолбакка, куоракка биир сиргэ, биир тэрээһиҥҥэ анаан буолара ордук этэ.
Биһиэхэ да кыахтаах, спорду өйдүүр, сыаналыыр салайааччылар, энтузиастар бааллар дии. Хайаан даҕаны уруйдаан-айхаллаан, бэлэх-туһах биэриэххэ диэн буолбакка, омугу биир санааҕа түмүүгэ, спордунан дьарыктанааччылары көҕүлүүргэ, ыччаттары иитиигэ-үөрэтиигэ сыаллаан тэрийиэххэ сөп. Уонна оттон олимпиецтарбытыгар болҕомто ууруу буолуо этэ буоллаҕа дии. Бу улахан түгэни таах хаалларымыахха. Атын дойдулартан кытыннылар, мэтээл аҕалбатылар диэн атарыхсытымыахха! Бары бэйэбит иитэн-үөрэтэн таһаарбыт спортсменнарбыт.
Олимпиец аатын ылыы хайдах курдук уустугун, ыараханын бэйэҕит билэҕит. Тустууктар Виктор Рассадин уонна Айаал Лазарев бэйэлэрин ыйааһыннарыгар аан дойду биэс күүстээхтэрин ахсааныгар киирдилэр. Бу мөлтөх көрдөрүү дуо? Марафоҥҥа Сардаана Трофимова элбэх күүстээх утарсааччыларын иннигэр түһэн, 14-с миэстэлэммитэ кэрэхсэнэр дии саныыбын.
Бу этиини эһиги туох дии саныыгыт? Спорпутун салгыы сайыннарыахха диир буоллахха, маннык тэрээһин ыытыллара төһүү күүс эрэ буолуоҕа.
«Дьулурҕан».
Бүгүн : 365
Билигин Олимпиадаҕа киирии хас көрүҥ аайы туспа лицензияланар буолбутугар, Олимпиада финалыгар (ол аата, холобур, Парижка) бэйэтэ туспа ситиһии, аны онно киһи кэрэхсиир кытыыта туспа бэлиэ түгэн.
Спортсмен спортивнай олоҕо кылгас. Онон баар ситиһиини кэмигэр бэлиэтиир наадалаах
манна эттэххэ:
Быйыл тустууга Россияҕа Яковлев Виктор үһүс буолбута, Саха Сиригэр, төрөөбүт Эдьигээнигэр боруонса мэтээл аҕальыта уу-чуумпу ааста быһыылаах
Андрей сөпкө этэҕин. Санааҕынан кыттыспыккар махтал!
Бастаан урукку 2021с., Токиотааҕы Олимпийскай оонньуу саныахха: Россияттан тустар Сергей Козырев мэтээл иһин киирсибэтэҕэ (кини Дэнг Чживей диэн кытайга эрдэ хотторон туораабыта), ол сылга Россия легионердара 5с иһигэр кыайан киирбэтэхтэрэ.
Бу сырыыга РФ легионердарыттан холобур Дагестантан сылдьар Казахстан тустууга Ю. Батырмурзаев эрдэ көппүтэ, онтон Ш. Шарипов Бахрейнтан тустубут, эмиэ Дагестан легионера, Олимпиадаҕа кыттар путевканы сатаан ылбатаҕа. Манна даҕатан эттэххэ Кавказ легионер бөҕөстөрө 74, 86, 97 киилэлээхтэргэ Парижка бастаатылар.
Онтон буҕа боотурдар, муҥутуур ыарахан 125 кг дылы ыйааһыҥҥа бүтүн Россия легионердарын көрөр буоллахха уонна бу иннинээҕи Токио Олимпиадатын кытта тэҥнээтэххэ: Айаал РФ көрдөрүүтүн тупсарда – (Токиоҕа 2021 сыллаахха Россияҕа сыһыаннаах уолаттар 5 иһигэр ким да суох 125 кг) 💪 Ох курдук оҥостубут, бөҕө-таҕа Кавказ ыарахан ыйааһыннаах уолаттара ама аҕыйах дуу, мөлтөх дуу буолуохтара дуо? – кыахтаахтара биллэр суол!
Быйылгы бүтүн Россия ыарахан ыйааһын легионердарын быыстарыгар – бастыҥнара биһиги уолбут саха бөҕөһө- маны үөрэ-көтө, астына бэлиэтиэх тустаахпыт!
👏👏👏
Сөптөөх бэлиэтээһин. Айаал тустуута, ситиһиитэ сылтан сыл ахсын улаатан, эбиллэн иһэр. Эҕэрдэ, саха бухатыырыгар!