Олимпиада – олимпиецтарга эрэ буолбатах

Уоппускабытыгар Байкалга, «Култушная» диэн сынньалаҥ базатыгар баран кэллибит. Сырыыбыт Парижка ыытыллыбыт XXXIII сайыҥҥы Олимпийскай оонньуулар кэмнэригэр сөп түбэспитэ.  

Биһиги Саха сириттэн отучча киһи буолан, бары бииргэ тутуһан сырыттыбыт. Бары да чэгиэн-чэбдик олоххо тардыһар, бэйэ доруобуйатыгар кыһаллар араас улуустан, куораттан мустубут дьон.

Биир киэһэ, көҥүл тустууга Виктор Рассадин Греция уонна Кытай тустууктарын хайдах курдук кыайталаабытын көрөн, бары сүрдээҕин астынныбыт, сүргэбит көтөҕүлүннэ. Ол үөрүүлээх түгэн долгунугар оҕустаран, салайааччыбыт – «Путь к собственному здоровью» бырайыак салайааччыта, педагогическай наука кандидата, психолог, консультант Александра Егоровна Ушницкая көҕүлээһининэн, Олимпиада туһунан лекция оҥорон дьоммор сырдаттым, кэпсээтим. Саха сириттэн бу оонньууларга биэс спортсмен кыттарын киэн тутта иһитиннэрдим. Ити кэмҥэ тустууктар Георгий Окороков, Айаал Лазарев, марафонец Сардаана Трофимова өссө күрэхтэһэ иликтэрэ.

Дьэ, итинтэн ыла күн аайы спорду сэҥээрээччилэргэ бэйэбит спортсменнарбыт хайдах кыттан иһэллэрин сонун быһыытынан кэпсээн-иһитиннэрэн истим. Бары түмсэн Виктор Рассадин тустуутун, Сардаана Трофимова сүүрүүтүн көрдүбүт, бэйэбит спортсменнарбытыгар ыарыйдыбыт. Ити курдук, Олимпиада барыбытын түмтэ.

Аны туран, база дьаһалтатын дьиэтигэр теннистиир остуол баарыгар, күрэхтэһии тэрийдибит. Барыта аҕыс киһи суруттаран кытынна. Бары да сыһыаннаах дьон эбит. Онон сытыы оонньуулар буоллулар. Күрэхтэһии түмүгүнэн Дьокуускай куорат 20 №-дээх орто оскуолатын үлэһитэ Светлана Кириллова бастаата. Иккис миэстэни сынньанар бөлөх салайааччыта Александра Ушницкая ылла. Оттон үһүс бириистээх миэстэҕэ Дьокуускайдааҕы Медкиин үлэһитэ Зинаида Куприянова таҕыста.

Кыайыылаахха, А.Е. Ушницкая олохтообут өйдөбүнньүк бирииһэ туттарылынна. Ити курдук, биһиги сынньалаҥмытын көхтөөхтүк атааран, бары да сэргэхсийдибит, астынныбыт. Бу тэрээһиннэрбит “Олимпиада – олимпиецтарга эрэ буолбатах” диэн девиһинэн салайтаран ыытылынна.

Александра Егоровна Ушницкая чэгиэн-чэбдик олоҕу тарҕатааччы инструктор буоларын быһыытынан, Саха сирин дьонун анаан бу базаҕа мунньан, сынньалаҥы уонна бэйэ доруобуйатын бөҕөргөтүүнү бэркэ тэрийбитигэр улахан махтал! Ол курдук, «Култушнайга» сырыыбытыгар хас күн аайы кини көҕүлээһининэн сэрээккэлэр, эрчиллиилэр, сөтүөлээһиннэр, култуурунай сынньалаҥнар тиһигин быспакка ыытылыннылар.

Петр ПАВЛОВ.