Үтүө киһиэхэ үйэлээх өйдөбүнньүк

Cаха Өрөспүүбүлүкэтин Национальнай библиотекатын устуоруйаҕа саалатыгар үгэс быһыытынан сэргэх тэрээһин буолан ааста. Куттал суох буолуутун сулууспатын отставкаҕа полковнига, Саха сирин норуотун хаһаайыстыбатын үтүөлээх үлэһитэ, Чурапчы улууһун Алаҕар нэһилиэгин бочуоттаах олохтооҕо, успуорт бэтэрээнэ Сергей Васильевич Лыткин сырдык аатыгар анаммыт, саҥа бэчээттэнэн тахсыбыт кинигэ сүрэхтэниитэ буолла.

Кинигэ халыҥ тастаах, элбэх ахтыылаах, С.В. Лыткин олоҕун бары кэрчиктэрин хабар аҕыс түһүмэхтээх, элбэх сэдэх хаартыскалардаах – өйдөбүнньүк быһыытынан “Сайдам” кинигэ кыһатынан бэчээттэнэн тахсыбыт.

Былырыын олохтон туораабыт киһини кэриэстээн, киниэхэ сүгүрүйэн бу тэрээһиҥҥэ элбэх киһи муһунна. Биир идэлээхтэрэ, биир дойдулаахтара, бииргэ төрөөбүттэрэ, аймахтара, успуорт бэтэрээннэрэ… Көрсүһүү хаһан баҕарар буоларыныы, истиҥ быһыыга-майгыга барда.

Сергей Васильевич олоҕун, үлэтин туһунан элбэх ахтыы оҥоһулунна. Ол курдук, Куттал суох буолуутун сулууспатын бэтэрээнэ Афанасий Кириллин, СӨ норуотун хаһаайыстыбатын үтүөлээх үлэһитэ Василий Сорокоумов, СӨ үтүөлээх юриһа Игорь Николаев, спорт үтүөлээх маастара Степанида Артахинова, Алаҕар нэһилиэгин баһылыга Иван Оконешников, РФ, СӨ үтүөлээх враһа Вячеслав Александров, СӨ култууратын үтүөлээх үлэһитэ Семен Протодьяконов, Монреаллааҕы-76 Олимпиада үрүҥ көмүс призера Александр Иванов уо.д.а. Сергей Васильевич киһи, доҕор, үлэһит быһыытынан майгытын, олоххо сыһыанын, көрүүлэрин туһунан истиҥник аҕыннылар. Кинилэр бары биир киһи курдук, С.В. Лыткин оҕо эрдэҕиттэн сүрдээх бэрээдэктээҕин, үтүө майгылааҕын, үчүгэйдик ыллыырын, улуу тренер Д.П. Коркиҥҥа уһуйуллубутун, кимиэхэ баҕарар көмөҕө кэлэргэ бэлэмин бигэргэттилэр.

Бэлиэ түгэҥҥэ Чурапчы улууһун бочуоттаах олохтооҕо, спорт бэтэрээнэ Альбина Поисеева, Таатта улууһун бочуоттаах олохтооҕо, көҥүл тустууга ССРС спордун маастара Гаврил Каприн ыыппыт эҕэрдэлэрэ ааҕан иһитиннэрилиннэ.

Тэрээһин кыттыылаахтара, кинигэни бэрт кылгас кэм иһигэр оҥорон, бэчээттэтэн таһааттарбыт С.В. Лыткин кэргэнэ Александра Петровна Лыткинаҕа уонна С.В. Лыткин бииргэ төрөөбүт быраата Валерий Васильевич Лыткиҥҥа – хаһан да сүппэт-симэлийбэт кэриэстэбил үтүө өйдөбүнньүгү күн сирин көрдөрбүттэригэр махталларын биллэрдилэр.

Үтүө киһи, истиҥ доҕор, бүгүрү үлэһит Сергей Васильевич Лыткин аатын үйэтитии өссө салҕанар. Кинигэ сүрэхтэниитигэр эппиттэрин курдук, аны сотору кэминэн төрөөбүт Алаҕарыгар (Чыаппараҕа) С.В. Лыткин пааматынньыга туруоҕа.

    Петр ПАВЛОВ.