Степан Сивцев: «Күрэхтэһиибит сыалын-соругун ситтэ»

Республика көҥүл тустууга эдэрдэргэ сүүмэрдэммит хамаандатын сүрүн тренерэ, Россия уонна Саха сирин үтүөлээх тренерэ Степан Петрович Сивцевтэн, күрэхтэһии түмүгүнэн кылгастык санаатын үллэстэригэр көрдөстүм.

-Биһиги аатырбыт бөҕөспүт, олимпийскай чемпион Павел Павлович Пинигин аатынан «Саха сирин тимир суоллара» тэрилтэ бирииһигэр күрэхтэһиибит үчүгэйдик түмүктэннэ. Күүстээхтэр быһаарылыннылар. Кыра уолаттарга 534 оҕо 17 ыйааһыҥҥа күөн көрүстэ. Омук дойдуларыттан уонна Россия регионнарыттан хамаандалар кэлэн, тэрээһиммит сыалын-соругун ситтэ диибит. Онтон бу аан дойдутааҕы турнирбытыгар биэс дойдуттан (Монголия, Казахстан, Кыргызстан, Таджикистан, Беларусь) уонна эмиэ дойдубут регионнарыттан барыта 174 эдэр бөҕөс кытынна. Саамай үөрэрбит диэн, оҕолор көбүөргэ бүгүҥҥү бэлэмнэрэ хайдаҕын көрдөрдүлэр. Ханнык даҕаны эчэйии суох. Саха сириттэн, маннык үчүгэй састаапка түөрт уол бастаабыта, мин санаабар үчүгэй.

Биллэн турар, биһиги арыый элбэххэ былааннаммыппыт, ол эрээри, кэлээччилэр эмиэ, сылы быһа күүстээхтик эрчиллэ сылдьар буоллахтара. Дагестан, Ингушетия, Чечня, Москва, Брянскай, Калининград курдук ыраах куораттартан кэллилэр.

Күрэхтэһии чэрчитинэн Монголия уонна Бурятия хамаандаларын кытта табаарыстыы көрсүһүүлэри тэрийдибит. Бачча элбэх ороскуоттаан кэлиигэ-барыыга тустуу уопсай сайдыытыгар туһалаах буоллун диэн. Итиэннэ мин бэйэм тус санаабар, табаарыстыы көрсүһүүлэр кыттыбыт оҕолорго инникитин улахан төһүү күүс, туһалаах опыт буолуо дии саныыбын уонна эрэнэбин.

Бу бөлөх оҕолортон сотору кэминэн республика ыччаттарга, онтон салгыы улахан дьоҥҥо хамаандатыгар эбиллии буолуоҕа диэн эрэннэрэбин. Биһиги бары ол туһугар үлэлиэхтээхпит уонна үлэлиибит даҕаны.

–Дьэ, кырдьык, аатырбыт тустуукпут Павел Пинигин аатынан күрэхтэһиигэ омук сириттэн уонна Россия регионнарыттан элбэх хамаандалар кэлэн, түһүлгэни киэргэттилэр, таһымын улаатыннардылар. Маныаха бастатан туран, тэрийээччилэргэ, күрэхтэһиини ыытааччыларга барыларыгар барҕа махтал!

Петр Павлов.